Жамсрандорж Анхбаяр

Зүүндэлгэр 4-р багийн харьяат Жамсрандоржийн Анхбаяр 1972 онд Зуунмод суманд айлын ууган хүүхэд болон мэндэлжээ. Түүний буурал өвөө /ээжийн өвөө/ Баян сумын харьяат Баттулга улсын наадамд хонгор азаргаа дөрөвт хурдлуулж байсан бол, ээжийнх нь ах, аймгийн Алдарт уяач Найдангийн Дашзэвэг хонгор зүсмийн адуугаар одтой наадагч юм. Түүний нэртэй хонгор зүсмийн адуунууд Жаргалантын сангийн аж ахуй хавиар нэгэн үе сайн хурдалж байжээ. 

Ж.Анхбаярын хувьд хоёр жил сумын наадамд хурдан морь унаад, 1993 оноос бие даан морь уяж эхэлсэн байна. Дээдчүүлийнхээ үйл хэргийг үргэлжлүүлж удам залган уяа эвлүүлсэн тэрээр 1997 онд Төв аймгийн Баянжаргалан сумын наадамд хонгор халзан азаргаа айргийн тавд дахиулан амжилтын гараагаа эхэлж, 2001 онд Говьсүмбэр аймгийн баяр наадамд хонгор азаргаа дөрөвт давхиулан, Алтанбулаг суманд болсон Төв аймгийн хаврын бүсийн уралдаанд хул хязаалан айрагдуулжээ.