Уяач Ц.Буянбаатар: Аавынхаа хүслийг биелүүлсэндээ баяртай байна

- Уяа эвлэг, морьд хурдан сайхан наадаж байна уу?
- Хур бороо элбэгтэй дэлгэр зун болж сайхан наадаж байна. Он гарсаар одтой сайхан наадаж улс бүсийн томоохон уралдаанаас гурван ч айраг хүртлээ. Дүнжингаравт их морь айргийн таваар, төрийн наадамд хул үрээ айргийн гуравт хурдаллаа. Сая Хангайн бүсийн даншигт бор шүдлэн маань айргийн тавд давхилаа. Төрийн сүлдэндээ л залбирч сууна даа.
- Төрийнхөө хишгийг хоёронтоо хүртлээ. Тэр тусмаа нэг адуугаараа. Сэтгэгдлээсээ манай уншигчидтай хуваалцахгүй юу?
- Монгол эр хүн болж төрсний омогшил бахархал нь төрийнхөө наадамд морь хурдлуулах шүү дээ. Ганц өөрийнхөө ч биш нутаг усныхаа, аавынхаа нэрийг гарган хүслийг нь гүйцээсэн болохоор сайхан байлгүй яахав. Миний аав Дамбын Цагаанбанди гээд моринд дуртай, адуу сайн шинждэг хүн байсан. Битүү морьд л шинжиж авна, авсан болгон нь хурдалдаг хүн байлаа. Аав минь хоёр хурдан хонгор морьтой, тэднийгээ төрийнхөө наадамд уралдуулна гэж ярьдагсан. Манайх 1997 онд хот руу шилжиж ирсэн юм. Гэтэл зуд турхан болоод тэр үед ямар адууг тэжээдэг байсан биш, морины тамир муу улсын наадамдаа уралдуулж чадаагүй. Ингээд нэг их удалгүй 2002 онд муу аав минь бурхан болсон доо. Төрийнхөө наадамд морио уралдуулна гэсэн аавынхаа хүслийг нь гүйцээн, бүүр айрагдуулсандаа баяртай байна. 
- Хэдийнээс эхэлж уяа сойлго тааруулах болов? 
- Хурдан хүлгэдийн босоо цагаан хийморьт сүслэх болсонд аавын минь нөлөө бий. Би 2001-2007 онуудад Замын цагдаагийн газрын техник хяналтын хэлтсийн морины салбарт ажиллан улсын наадмын бүх морьдыг дагадаг байлаа. Тэр үеэс л илүү шимтэн сонирхох болсон юмуу даа. Ингээд 2007 оноос хойш таван жил тасралтгүй морь уяж байна.
- Таны нэрийг гарган хурдтай сайхан давхиж байгаа ямар ямар хүлгэд байна вэ?
- Нэг хүрэн морь байгаа. Сүхбаатар аймгийн Мөнххаан угшилтай. Надад долоон настай битүү морь ирсэн. Тэгээд хойтон жил нь “Булган хангай 2011” бүсийн наадамд айргийн гуравт, “Дүнжингаравын хурд-2012” уралдаанд айргийн тавд хурдалж баясгасан хүлэг бий. Мөн улсын наадамд эрлийз хэмээн хасагддаг бор шүдлэн байна. Их хурдтай байгаа. Уг нь бол цэвэр монгол шүдлэн. Угшил гарвал гэвэл Дорнод аймгийн Баянтүмэн сумын харьяат Б.Хүрэлбаатар буюу Хүрлээ багш гэж алдаршсан хүнээс би сарваатай гүү худалдаж авсан юм. Ноднин сайн байсан ч ханиадтай болохоор нь уралдуулаагүй юм. Харин Хүй долоон худагт болсон Хангайн бүсийн уралдаанд мал эмнэлгийн нарийн үзлэг шинжилгээгээр жинхэнэ монгол гэдэг нь батлагдан уралдлаа. Сайн ч давхилаа айргийн тавд хурдалж байна. Хэрвээ улсын наадамд уралдсан бол юм дуулгах л байсан юм.
- Таны хувьд улс бүсийн хэдэн айраг түрүүтэй болсон байна?
- Одоогоор улс бүсийн таван айрагтай болоод байна.
- Баярлалаа. Таныг хурдан тууртын босоо цагаан хийморь өнөд ивээж яваг.