Ярилцах болзол хангагдав

Ярилцлага авах болзлоо хангуулсан таатай мэдрэмжээ хуваалцах гээд... Юун болзол билээ, ярилцлага авахад болзол байдаг хэрэг үү гээд уншигч та гайхаж байна уу? Аргагүй.. Ийм явдал болсон юм.

2022 онд Халзан сумын уяачидтай уулзах болоод подкаст буюу дүрст ярилцлага хийх хүмүүсээ товлолоо. Нэрсийн жагсаалтанд унаган адуу нь улс, бүсийн уралдаанд сайн давхиж буй Баярын Баттөрийг багтаав. Өөрийнх нь амжилтаас гадна өвөг дээдсийнх нь талаар яриулна гэсэн тооцоотой.

Түүний дээдэс бол Халзан нутгийн бэсрэг хурдан угшлын нэг Жина адууг үндэслэгчид юм. Галшараас  эхтэй хонгор адууны удам Сүхбаатар аймгийн баяр наадамд түрүүлж, айрагдсан нь олонтаа бөгөөд тэр адууны голомтыг сахигч нь Б.Баттөр.

Халзан сумаар хөндлөн гулд давхиж, харихын өмнө аймгийн төвийг зорин Баярын Баттөр Алдартынд очиж хэрэг зорилгоо хэлтэл “Одоо сэтгүүлийн ярилцлагаа өгье. Дүрстэй ярилцлагаа улсын цолоо авчихаад болъё хө” хэмээн эрсхэн хэлсэн. Ярилцах хүсэлт тавиад анх удаа “болзол”-д бүдэрсэн мэдрэмж... Марталгүй гурван жил болжээ.

Энэ зун тэр болзол минь дүүрэв бололтой. Баярын Баттөр хэмээх удамь уяачийн амжилтын буухиа 2014 оноос эхэлдэг.

Унаган хул даага нь АХ-ын 93 жилийн ой, Үндэсний их баяр цэнгэл наадамд айргийн дөрөвт хурдлан, давхар уяагаар Дорнод аймагт болсон зүүн бүсийн уралдаанд аман хүзүүнд  давхиж байв.

Жилийн дараа /2015 онд / Сүхбаатар аймагт зүүн бүсийн уралдаан болж Уудам хэмээн хүрэн хязаалан 209 үрээнээс гуравт хурдалсан.

Хоёр жилийн дараа /2017 онд/ Баруун-Уртад болсон зүүн бүсийн уралдаанд Босоо халзан хэмээх хүрэн шүдлэн нь 299 үрээнээс аман хүзүүнд баригдаж байв.

Хоёр жилийн дараа 2019 онд Засгийн газрын тогтоолт зүүн бүсийн уралдаан Дорнод аймагт болоход их насны морьд угсраагаар нь оруулж, ид хаваа гайхуулж байв. Тэр наадамд саарал морь нь гурвалж, хонгор морь дөрөвт баригдсаныг мориныхон мартаагүй байх.

Гурван жилийн дараа /2022 онд/ Сүхбаатар аймаг үүсч байгуулагдсаны 80 жилийн ой, зүүн бүсийн уралдаанд  их насны хүрэн морь айргийн тавд хурдалсан.

Анзаарвал мань эр 2-3 жил болоод л төрийн зарлигт наадмаас хишиг хүртдэг хуваарьтай байгаа биз.

2025 он бол хуваарьт жил. Дорнод аймагт болсон зүүн бүсийн уралдаанд бор азарга нь айргийн тавд хурдлан төрийн зарлигт наадмын найм дахь хишгээ хүртэв.

Ийнхүү Баярын Баттөр уяач том наадмын өм нээснээс хойш 11 жилийн дараа улсын Алдарт уяач цолны болзлыг хангаж, би бээр ярилцлага авах эрхтэй боллоо ккк.

Энэ удаа өмнөх төлөвлөгөөн дээрээ нэмээд хүнд очсон адуунуудынх талаар хөвөртөл асуунаа. Миний сонсож дуулснаар Сэлэнгийн бүсэд соёолондоо гурвалж, улсад долоолоод , “Их хурд-9”уралдаанд тавладаг Ч.Болд-Эрдэнийн хээр азарга эдний адуу.

Мөн Ч.Болд-Эрдэнэ Алдартын өнгөрсөн жил

Баянхонгорт түрүүлж, Эрдэнэтэд айрагдсан халтар азарга лав мөн. Үүнээс гадна М.Цэрэнжав Манлайн уядаг Хөвсгөлд болсон хангайн бүсийн уралдаанд гурвалж, Хэнтий аймгийн 100 жилийн ойд айргийн гуравт хурдалсан хар халзан азарга, 2013 онд Төв аймгийн 90 жилийн ойд соёолондоо айргийн тавд хурдалсан МУ-ын Манлай уяач Б.Бадраагийн Товгор хээр, Орхон аймгийн 40 жилийн ой, хангайн бүсийн уралдаанд айргийн дөрөвт хурдалсан Булган аймгийн Хутаг-Өндөр сумын Болдбаатарын хээр соёолон, 2018 оны Эрдэнэтийн бүсэд аман хүзүүнд хурдалсан Д.Дэлгэрбаярын халтар, Завхан аймгийн 100 жилийн ой, баруун бүсийн уралдаанд даага тавлаж, шүдлэн үрээ Говьшанхад аман хүзүүдэн, хязааландаа говийн бүсэд айргийн тавд хурдалсан Э.Бат-Эрдэнийн зээрд халзан

, Өндөр Гэгээн Занабазарын  мэлмий гийсний 390 жилийн ой, хангайн бүсийн уралдаанд гурвалсан Д.Одхүүгийн Буган

халтар соёолон Б.Баттөр Алдартын адуу гэдэг.

Мартах шахлаа 2014 онд Галданбошигт хааны мэндэлсний 370 жилийн ой, баруун бүсийн уралдаанд айргийн тавд хурдалсан Я.Санжмятавын хээр шүдлэн мөн тэдний адуу гэж дуулсан шүү.

Илүү дэлгэрэнгүйг ярилцахдаа асуунаа.

А.Тэлмэн