Шилдэг унаачид “Найрамдал” зусланд амарна

15 жилийн ойгоо өргөн дэлгэр тэмдэглэсэн Дорнод аймгийн МСУХ АХ-ын 91 жил, Дорнод аймаг байгуулагдсаны 81 жилийн ойн баяр наадамд авхаалж самбаа гарган унасан морьдоо түрүүлгэсэн шилдэг унаачдаа урамшуулахаар болжээ. Энэхүү аяны хүрээнд Хэрлэн сумын уугуул Болдын Мичидмаа /9 настай, эмэгтэй/, Ганжаргалын Хонгорзул /10 настай, эмэгтэй/, Гантулгын Төрхүү /10 настай, эрэгтэй/, Матад сумын уугуул Төмөр-Очирын Төмөрхуяг /10 настай, эрэгтэй/ Баяндун сумын уугуул Лувсандоржийн Сугархүү /12 настай, эрэгтэй/ нарын аймгийн шилдэг унаачид ОУ-ын Найрамдал зусланд амрахаар нийслэлд хүрэлцэн ирээд байгаа аж. Морин спортын хөгжилд өөрийн хувь нэмрээ оруулж яваа шилдэг унаач хүүхдүүд Найрамдал зусланд амрахын зэрэгцээ төрийн ордонд зочилж, УИХ-ын гишүүн, аймгийн МСУХ-ны тэргүүн Х.Болорчулууны хамт дурсгалын зургаа татуулан ,  Чингис хааны хөшөөнд хүндэтгэл үзүүлж,  Цонжинболдог дахь 13 –р зууны үеийн түүхэн музейн үзвэртэй танилцах аж. Тэдний зардлыг аймгийн МСУХ-ноос бүрэн хариуцсан бөгөөд өнгөрсөн жил аймгийн Алдарт уяач С.Бямбасүрэнгийн хүү Мөнхтамга нарын шилдэг таван унаач хүүхдийг "Найрамдал" зусланд амрааж байсныг ийнхүү уламжлал болгон явуулахаар тогтжээ.

   Дорнод аймгийн МСУХ-ны НБДарга Б.Батсайхан