Афирмед (Affirmed

1975 онд Харбор Вию Фарм-д төрсөн зээрд халзан зүстэй унаганд эзэн нь Афирмед гэдэг нэр өгсөн нь хожим АНУ-ын XX зууны шилдэг хүлгийн жагсаалтын 12-т бичигдсэн гайхамшигт адуу болжээ. Афирмед нь 1978 онд Гурван титмийн 11 дэх эзэн болсон бөгөөд түүнээс хойш энэхүү нэр хүндтэй цолыг хүртсэн хүлэг хараахан төрөөгүй л байна. Афирмед-н дээд удамд XX зууны тэргүүн хурдан хүлэг Мен О’Вар, түүний үр Гурван титмийн 4 дэх эзэн Вар Адмирал-ын цус орсон байна. Дашрамд сонирхуулахад Гурван титмийн 2 дахь эзэн Галант Фокс-н төл нь Омаха нь Гурван титмийн 3 дахь эзэн болсон нь маш ховор тохиолдол юм. Гурван титмийн уралдаанууд болох Кентаки Дерби 1875 оноос, Прийкнес Стейкс 1873, Белмонт Стейкс 1867 оноос эхлэн явагдаж эхэлсэн бөгөөд 135 жилийн түүхэнд ердөө 11 адуу л энэхүү эрхэм цолыг хүртээд байгааг манай хурдан морь сонирхогчид андахгүй биз ээ. Мөн Афирмед-г түүний мөнхийн өрсөлдөгч байсан Алидар-тай байнга холбон ярьдаг билээ. Алидар нь XX зууны шилдэг хүлгийн жагсаалтын 27-д ордог бөгөөд энэ 2 хүлэг хоорондоо 10 удаа уралдаж, Афирмед 7 удаа, Алидар 3 удаа дийлжээ. Хамгийн сонирхолтой нь Кентаки Дерби, Прийкнес Стейкс, Белмонт Стейкс уралдаануудад Афирмед дандаа дийлж түрүүлсэн бол дийлдсэн Алидар нь Гурван титмийн уралдаануудад бүгдэд нь аман хүзүүдсэн анхны адуу болжээ. Энэ 2 хүлэг ихэнх уралдаандаа бусдаас хол тасарч зуузай холбон барианд ордог байв. Ер нь Афирмед, Алидар 2-ыг дандаа хамт ярьдаг бөгөөд нэрс нь холбоо үг шиг л болсон юм. Афирмед нь нийт 29 удаа уралдахдаа 22 түрүүлж, 5 аман хүзүүдэж, 1 удаа 3-т хурдалжээ. Тэрээр уралдааны бай шагналд 2.4 сая доллар хүртсэн нь тухайн үедээ дээд амжилтад тооцогдож байв. Тэрээр 5 настайдаа зодог тайлж, үржүүлгэнд орсон бөгөөд түүний үр төлүүдээс 89 нь ямар нэгэн уралдааны түрүү болж, нийт 44 сая доллараас дээш хэмжээний бай шагнал хүртсэн байна. Афирмед нь Америкийн Оны хүлэг цолыг 2 удаа, Оны шүдлэн үрээ, Оны хязаалан үрээ, Оны соёолон цолыг тус бүр 1 удаа хүртэж байв. Мөн хурдан морины Алдрын танхимд заларсан цөөхөн адууны нэг болжээ. Түүний алдар гавъяаг үнэлж Калифорн мужийн Напа хотын нэгэн гудамжийг нэрээр нь нэрлэсэн бол нэрэмжит уралдааныг нь жил бүрийн 6 дугаар сарын дундуур Холливүүд паркад хийдэг болсон байна.

 Эх сурвалж: www.mongoljockeyclub.com