2012 оны шилдэг азарганууд

1. Монгол улсын Тод манлай уяач Г.Батхүүгийн Соёмбо зээрд  10 оноогоор чансаатай есөн азаргыг тэргүүллээ. Ардын хувьсгалын 91 жилийн ойн баяр наадмын айргийн гурав, “Дүнжингарав”-ын аман хүзүү, Өмнөговийн бүсийн аман хүзүүн амжилтаараа 2012 оны шилдэг азарга болж буй нь энэ юм.
2. Монгол улсын Манлай уяач Д.Бат-Эрдэнийн Улс халзан 9 оноогоор “аман хүзүүдлээ”. Улс халзан Ардын хувьсгалын 91 жилийн ойн хурдан азарганы уралдаанд түрүүлж. “Дүнжингарав 2012”-т аман хүзүүдээд байгаа билээ.  Хүрэн халзан нь Сүхбаатар аймгийн Түмэнцогт сумын уугуул аймгийн Алдарт уяач Өлзийхутагийн Шинэтулгын унаган адуу бөгөөд уяа сойлгыг нь аймгийн Алдарт уяач Б.Цэндбаатар тааруулдаг юм.
3. Сүхбаатар аймгийн Баяндэлгэр сумын уяач Б.Цэрэнбалтавын халтар азарга 8 оноогоор удааллаа. Халтар азарга АХ-ын 91 жилийн ойн баяр наадмын эрлийз дээд насны ангилалд айргийн таваар хурдлан, “Дүнжингарав”-ын  эрлийз ангилалд аман хүзүүдсэн юм. 
4. Өвөрхангай аймгийн Өлзийт сумын уугуул Д.Сугарын хул 8 оноогоор жагсаалтын дөрөвдүгээрт бичигджээ. Хул азарга АХ-ын 91 жилийн ойн баяр наадамд дөрөвлөж, Төвийн бүсийн даншигт түрүүлсэн юм.  Тод манлай уяач Д.Ононгийн унаган адуу болох хул азарганы уяаг Тод манлай өөрийн хүү О.Батбилэгийн хамтаар тааруулдаг билээ. 
5. Дундговь аймгийн Дэрэн сумын уугуул Ц.Бямбасүрэнгийн хүрэн 7 оноогоор энэ оны шилдэг азаргын нэг боллоо. Хүрэн азарга Улсын баяр наадам, Есөн зүйлийн даншигт тус тус аман хүзүүдсэн юм. 
6. Аймгийн Алдарт уяач Б.Наранхүүгийн Монгол хээр “Дүнжингарав”-ын түрүү, Дундговийн бүсийн наадмын айргийн тавын амжилтаараа багтжээ. Хээр азарга нь Сүхбаатар аймгийн Түвшинширээ сумын уугуул Пүрэвдоржийн унаган адуу юм.
7. Аймгийн Алдарт уяач Ч.Ганзоригийн хүрэн азарга Төвийн бүс болон Есөнзүйлийн даншгийн аман хүзүүнд хурдалсан амжилтаараа зургаан оноо цуглуулан, шилдэг есийн нэг боллоо.
8. Төв аймгийн Бүрэн сумын уугуул Х.Улам-Өрнөхийн хул азарга Төвийн бүсийн айргийн дөрөв, Есөнзүйлийн даншгийн гуравт хурдлан луу жилийн шилдэг азарганы нэг болжээ.
9. Аймгийн Алдарт уяач Б.Батсүхийн Бондгор хээр Ардын хувьсгалын 91 жилийн баяр наадмын айргийн тавын амжилтаараа удааллаа.  Хурдан  хээр нь Дорнод аймгийн Халхгол сумын уугуул, аймгийн Алдарт уяач А.Цогоогийн унаган адуу.
10. Сүхбаатар аймгийн Дарьганга сумын уугуул М. Батжаргалын саарал Сүхбаатар аймгийн Зүүн бүсийн даншигт түрүүлсэн амжилтаараа  чансаатай азаргаар нэрлэгдэж байна. 

П.Ундармаа