“Шанхын хүлэг” шилдгүүдээ тодрууллаа

Цаг хугацааны түүх болон үлдсэн хуучин оноо
Цаглашгүй их амжилт үйлсээр үдэж
Он цагийн тооллоор учран золгож байгаа шинэ жилээ
Од хийморь, орчлонгийн сайн сайхан бүхнийг билгэдэн угтсан Өмнөговь аймгийн Цогтцэций сумын уяачдын холбооны шинэ жилийн цэнгүүнээс хийсэн бичил сурвалжлагаа хүргэе.
“Шанхын хүлэг” уяачдын холбоо бүтэн жилийн ажил, алдаа оноогоо дүгнэдэг шинэ жилийн цэнгүүнээ гурав дахь жилдээ хийж байгаа нь  энэ бөгөөд 2012 оны шилдгүүдээ тодруулах ёслол энэ сарын 15-ны бямба гарагт Баруун суугийн төвд зохион байгуулагдсан юм. Энэ удаагийн арга хэмжээнд улс, аймаг, сумын Алдарт уяачид тэдний гэр бүл унаач хүүхдүүд гээд 150 гаруй зочид төлөөлөгчид хүрэлцэн ирсэн бөгөөд оны шилдгийн шилдэг уяачаар 2012 онд улс, бүс, аймаг сумын уралдаануудад амжилттай сайн оролцсон аймгийн Алдарт уяач Н.Алдаржаргал тодорсон.
Харин шилдэг уяачаар төрийнхөө их баяр наадамд Богд хээр соёолонгоо түрүүлгэж, түүнийгээ хэдхэн хоногийн дараа болсон төвийн бүсийн даншиг наадмын үеэр баталсан, аймгийн Алдарт уяач /МУ-ын Алдарт уяачийн болзол биелээд буй/, аймгийн ИТХ-ын дарга Х.Түмэнбаяр болон Ч.Цэцэг-Өлзий, Н.Энхсайхан, Б.Тогтох нар шалгарна билээ.
Уяачийн эрдмээр ир нь жигдэрсэн хүлгээ уралдааны замд зөв удирдан түрүүлгэж, айрагдуулсан  Б.Мөнх-очир оны “ШИЛДЭГИЙН ШИЛДЭГ УНААЧ”-аар, Содбаяр, Оюунгэрэл, Мөнхдөл, Өнөрбат нар оны “ШИЛДЭГ УНААЧ” хүүхдээр тодорч, ирсэн зочдоос магтаалын үг дуулсан юм.
“Шанхын хүлэг” зөвхөн уяач, унаачаа урамшуулаад зогссонгүй, мориор дамжсан үндэсний өв соёлыг нийтэд түгээн дэлгэрүүлэх үйлсэд хувь нэмрээ оруулж буй уран бүтээлчдийг урамшуулж, шандаст хурдан хүлгэдийг бийрийн урнаар амилуулдаг зураач О.Баатарсүрэнг “ШИЛДЭГ ЗУРААЧ”-аар нэрлэн, Улс халзан, Богд хээр, Наранбор бүтээлүүдийг нь өндрөөр үнэлсэн. Мөн “Хурдан бор”, “Бөтөнгийн бор”, “Уяач”, “Бүргэд” шүлгээрээ уяач Н.Амгаланбаатар шилдэг уран бүтээлчээр шалгарч, шаггүй найрагч гэдгээ харуулаад авсан. Хээрээр гэр хэцээр дэр хийж, гадаа гандаж, хөдөө хөхөрч явдаг уяачийн арын албыг хашиж, амжилт бүтээл, алдаа оноотой нь сүлэлдэн байдаг гэргий нарын оролцоог “Шанхын хүлэг”-чүүд анх удаа үнэлсэн нь онцлууштай үйл явдлын нэг байсан.
Энэ насаа говь шанхын хурдыг хадгалахад зориулж, хурдан хүлгийнхээ уяа сойлгыг тааруулж ирсэн ахмад уяач Б.Шийхэр болон түүний гэргий Н.Мядаг нарыг  “ШИЛДЭГ ГЭР БҮЛ”-ээр өргөмжилж, залаагүй Алдарт уяачийн гэргий нарт урам хайрласан юм. Шанхын хурдыг хадгалж, хөгжүүлэхэд хувь нэмрээ оруулж буй шилдэг уяачдаа шагнаж урамшуулсан баярын арга хэмжээний бас нэгэн сонирхолтой хэсэг нь ирсэн зочдын аз хийморийг сорьсон азын сугалаа  байлаа. Энэ төрөлд залуус аргагүй л хийморьтой байж, Галсан, Цогоо нар хурдан удмын даага зургийн аппаратын эздээр тодорсон юм.
Ийнхүү дуулгах сонин, дуурсах хуучтай “Шанхын хүлэг”-ийн баярын цэнгүүн
Улиран одож буй хуучин он бидэнд
Ухаарал баяслыг хайрлаж
Угтан авч буй шинэ он бидэнд
Урам зориг, амжилт бүтээл, аз жаргалын дээдийг авчрах болтгуай гэсэн сайхан ерөөлөөр өндөрлөсөн юм.

А. Мөнх-Эрдэнэ