Шилдэг унаач Б.Дэмбэрэлдодов: Түрүүлсэн морио харахаар өөрийн эрхгүй хайр хүрээд байдаг юм

2012 оны амжилтаараа тэргүүлсэн шилдгүүдийн нэг нь  Архангай аймгаас эмээтэйгээ ирж шагналаа гардан авсан Б.Дэмбэрэлдодов хүү байлаа.  Уяач  аавын хүү зургаан наснаасаа  хурдан морь унаж байгаа  бөгөөд  2012 онд нэг түрүү, 4 айргийн амжилтаараа ийнхүү шилдгүүдийн нэгээр тодорсон юм. “Адууны үнэр нь хүртэл сайхан даа “ хэмээн цөөн үгээр часхийтэл хэдхэн үг хэлэх додигор эр байна лээ. Ингээд “Дорнын унага” галын унаачтай цөөхөн хором ярилцсанаа хүргэж байна.
-2012 оны шилдэг унаач боллоо. Баярын сэтгэгдлээсээ манай уншигчидтай хуваалцаач?
-Баярлалаа.  Өнгөрсөн зун миний унасан морьдоос тав нь айраг түрүү хүртсэн байгаа. Энэ амжилтаа үнэлүүлэн шилдэг унаачдын нэг болсондоо би баярлаж байна. Шилдэг унаач болсноо дуулаад Архангай аймгийн Эрдэнэбулган сумаас эмээтэйгээ ирсэн. Сая шагналаа авахад эмээ маань хамт тайзан дээр гарсан. Та харсан уу? Эмээгээ баярлуулж байгаа болохоор надад бүүр ч сайхан байнаа.
- Хэддүгээр ангид сурдаг вэ? Морь унаад хэдэн жил болж байна?
-Архангай аймгийнхаа хоёрдугаар сургуулийн тавдугаар ангид сурдаг. Одоо 10 настай.  Хурдан морь унаад дөрвөн жил болж байна.
-Аав ээжийнхээ тухай танилцуулаач?
-Аав, ээж маань малчин улс. Аав маань бас морь уянаа. Нэг их олон морь уяхгүй ч жил бүр нааддаг юм. Би бас аавдаа тусална, уясан морийг унана. Бид хоёр хамтдаа сумынхаа олон наадамд оролцож байгаа. Яваандаа арай том довонд уралдах байхаа. 
-Хурдан морь унахад хамгийн гоё нь юу байдаг юм бэ?
-Мэдээж уралдах л шүү дээ. Моринд мордсон л  өөр хүн болчих шиг санагддаг. Хүүхэд бүр л түрүүлж, айрагдахыг хүсч байгаа.  Тэр хүсэл биелэх хором бүүр ч их амттай. 
-Том болоод ямар мэргэжилтэй болох вэ?
-Уяач болно гэж бодож байгаа. Адууны үнэр нь л хүртэл гоё шүү дээ. Би хэлж мэдэхгүй байна л даа. Гэхдээ адууны дэргэд байхад өөрийн эрхгүй нэг тийм сайхан мэдрэмж төрөөд байдаг юм. Тийм болохоор  том болоод ч адуунаас холдохгүй байхаа.
-Мэдээж айраг түрүү хүртэх сайхан. Гэхдээ сэтгэл гонсгор үлдэх наадам гэж байдаг л байх даа?
-Тэгэлгүй яахав, байна.  Түрүүлж чадаагүй бол муухай байдаг юмаа.
-Шарандаа уйлж байв уу?
-Үгүй шүү. Тухайн үедээ муухай санагдаж байгаа ч наадам нэгээр дуусах биш дээ. Ард нь зөндөө уралдаан хүлээж байгаа болохоор амжилт гаргана л гэж боддог. Өнгөрсөн зун би Г.Мөнхсайхан ахынхаа халтар азаргатайгаа сайхан наадсан. Бас “Босоо хүлэг” галын ахын хязааланг унаж айрагдуулан, азаргыг нь тавлуулсан. Ирэх жил  үүнээсээ илүү амжилт гарганаа. 
-Чөлөөт цагаараа юу хийх дуртай вэ?
-Морь л унах дуртай даа. Түрүүлээд ирсэн  морио харахаар өөрийн эрхгүй хайр төрөөд байдаг юм.
-Ярилцсанд баярлалаа. Сүүлийн асуултыг дүүдээ үлдээж байна.
-Баярлалаа. “Тод магнай” сайтаараа дамжуулан төрүүлж өсгөсөн аав ээждээ хайртай шүү, баярлалаа гэж хэлмээр байна. 

П.Ундраа