Говь-Алтай аймгийн 2013 оны уралдаануудын тов гарчээ

Энэ сарын 17-нд хуралдсан Говь-Алтай аймгийн морин спорт уяачдын холбооны тэргүүлэгчдийн хурлаар 2013 оны уралдаануудынхаа хуваарийг баталжээ.Усан могой жилийн уралдаан хаврын тэргүүн сард эхлэх бөгөөд 2-р сарын 17-нд “Алтайн хавар-2013” дээд гурван насны морьдын уралдаан аймгийн төвд зохион байгуулагдах аж.
Харин урд сумдын бүсийн уралдаан 3-р сарын 13-нд Чандмань суманд болж азарга, их нас, соёолон, хязаалан насны морьд шандас шалгах гэнэ. Зургаан насны хүлгэд тоосоо өргөх хойд сумдын бүсийн уралдаан 7-р сард Дарви суманд болох бол 6-р сарын 1-нд бага гурван насны морьдын уралдааныг аймгийн төвд зохион байгуулахаа тогтжээ. Харин 8-р сард “Монгол уяач-3000” зөвлөгөөнийг зохион байгуулж, ММСУХ-ны удирдлага, бүх сумдын төлөөлөлийг оролцуулан аймгийн зэрэглэлтэй уралдаан зохион байгуулахаар төлөвлөж байгаа аж. Түүнчлэн Есөнбулаг, Тайшир сумдад салбар уяачдын холбоог шинээр зохион байгуулж, 10-р сард аймгийн уяачдын холбооны бага хурлыг зохион байгуулан дүрмийн дагуу холбооныхоо тайланг хэлэлцэж, ММСУХ-ны их хурлын төлөөлөгчдийн сонгох юм байна.

А.Мөнх-Эрдэнэ