Монгол Жоки Клубын гишүүдийн хурал боллоо

Монголын цэвэр цусны адууны эздийн холбооны дэргэдэх Монгол Жоки Клубын гишүүдийн хурал өчигдөр буюу 2013 оны 1 дүгээр сарын 17-ны өдөр боллоо. Хурлаар 2012 оны ажлын тайлан, төсвийн гүйцэтгэл, 2013 оны ажлын төлөвлөгөө, төсөв зэрэг асуудлыг хэлэлцэж, гүйцэтгэх удирдлагыг шинээр томилсон байна.

Монгол Жоки Клуб нь 2012 онд Монгол анх удаа Англиас цэвэр цусны адуу авчрах, цэвэр цусны болон эрлийз адууны ойрын зайн уралдаан зохиох, угшлийн дэвтрийн загварыг гаргах, сэтгүүл хэвлүүлэх, цахим хуудас ажиллуулах зэрэг ажлыг хийж гүйцэтгэснээс гадна цэвэр цусны адуу зүчээ барих бэлтгэл ажлыг эхлүүлсэн юм. Мөн цэвэр цусны адууг тэжээж, арчлах, үржүүлэх ажилдаа Англиас мэргэжилтэн урьж авчран ажиллуулж байгаа билээ.

Монгол Жоки Клуб нь 2013 онд бизнес төлөвлөгөө боловсруулах, цэвэр цусны адууны үржүүлэг хийх, зүчээ барих, Англиас адуу импортоор оруулж ирэх ажлыг хөгжүүлэх, адууны дуудлага худалдаа зохиох, угшлийн дэвтрийг хөтөлж эхлэх, ойрын зайн сонгомол уралдаан зэрэг зорилт тавьснаас гадна цэвэр цусны адууны тухай мэдээллийг боловсруулж олон нийтэд хүргэх цахим хуудас ажиллуулж, сэтгүүл хэвлүүлэх юм.

Мөн Клубын гишүүдийн зүгээс нэрэмжит уралдааныхаа цар хүрээг өргөжүүлж, олныг хамруулах зорилгоор уралдааны бай, шагналын санг нэмэгдүүлэх шийдвэр гаргалаа. Энэ шийдвэрийн дагуу Монгол Жоки Клубын гишүүдийн зүгээс уралдааны бай, шагналд зориулан 24.0 сая төгрөгийн санхүүжилт гаргахаар болсон байна. Иймд уралдааны журамд өөрчлөлт оруулан дараагийн мэдээгээр та бүхэнд хүргэх болно.