Аймгийн хэмжээнд өвөлжилтийн байдал сайн байна

Энэ 10 хоногт салхи шуурга багатай тогтуун сайхан, хөдөө аж ахуйн салбарт тогтуун сайхан өдрүүд байлаа. Цогт-Овоо, Хүрмэн, Номгон, Даланзадгад сумдад бог мал төллөж эхэлсэн ба эх малын жилбэ сайн байна.  11, 14-нд нутгийн төв хэсгээр буюу Булган, Цогт-Овоо, Даланзадгад сумдын нутгаар 16-18 м/сек, бусад нутгаар 6-10 м/сек салхитай байж 11-нд Ханбогд сумын нутгаар зөөлөн цасан шуурга шуурлаа. Агаарын дундаж температур Баяндалай, Мандал-Овоо сумдад 14-16 м/сек, бусад нутгаар 8-11 градус хүйтэн байж өмнөх хугацаанаас дулаарч цас хайлж цасан бүрхүүлийн хэмжээ багаслаа. Сэврэй, Ханхонгор, Цогтцэций, Цогт-Овоо сумын нутгаар 0,0 - 0,8 мм тунадас орсон ба нийт нутгаар малын амны цастай, усны хүрэлцээ сайтай байна.
Ихэнх нутгаар бэлчээр хүрэлцээтэй байгаа боловч Мандал-Овоо сумын зүүн, хойт хэсгээр тааруухан байгаа нь ургамлын гарц муухан байсантай холбоотой. Мөн Ханбогд сумын баруун хэсгээр бэлчээрийн хүрэлцээ тааруухан байгаа нь уул уурхайн ашиглалттай холбоотой. Зуншлага намаржилт сайн байсан, бэлчээр хүрэлцээтэй байгаагаас мал тарга хүчээ алдахгүй 58-90 хувь дунд, дундаас дээш, 5-15 хувь дундаас доош тарга хүчтэй байна. Ханбогд, Гурвантэс, Цогтцэций сумдад уул уурхайн ашиглалтаас худаг усны ундарга муудаж усны хүрэлцээ багасч байна.
Өнгөрсөн хугацаанд цас хайлж нимгэрэн Цогт-Овоо, Манлай, Баяндалай, Сэврэй, Хүрмэн сумдын нутгаар 60-70 хувь, бусад нутгаар 10-40 хувийн цасан бүрхүүлтэй байгаа бөгөөд цасны дундаж зузаан 0-1 см, уулархаг нутгийн гуу жалгандаа хунгарын зузаан 20-40 см, аймгийн хэмжээнд өвөлжилтийн байдал хүндрээгүй, хоргодсон мал байхгүй, бэлчээр ус хүрэлцээтэй өнтэй өвөл болж байна гэж аймгийн УЦУОШТ-өөс мэдээллээ.