“Хутагтын хурд”-ын шилдгүүд

Догшин хутагтын өлгий нутгийн уяачид өнгөрөн одогч усан луу жилийн шилдгүүдээ тодруулж, тэднийгээ урамшуулсан тухай мэдээллийг бидэнд илгээлээ. Шинэ жилийн баярын цэнгүүнд тус аймгийн 11 сумын төлөөлөл оролцсон бөгөөд сүргийн манлай оны шилдэг азаргаар Хатанбулаг сумын уугуул, аймгийн Алдарт уяач Монхоодойн Жаргалсайханы алаг тодорчээ. Нутгийн нэрийг цуурайтуулсан энэхүү хурдан буян “Их мандал-2012” говийн бүсийн даншиг наадамд түрүүлсэнийг  эрхэм уншигч та бүхэн андахгүй бизээ. Луу жилд ийнхүү онгод хийморьтой наадсан алаг азарганы эзэн М.Жаргалсайхан оны шилдэг уяачаар шалгарч, баяр дээр баяр нэмсэнийг энд тэмдэглэх нь зүйтэй байх аа. Дорноговь аймгийн оны шилдэг их насны мориор 2012 онд аймгийн баяр наадамд түрүүлсэн Сайншанд сумын уугуул Мараахайн Чинзоригийн хонгор шалгарсан бол шилдэг унаачаар Өргөн сумын уугуул Өсөхжаргалын Мөнхбат нэрлэгджээ. Харин шилдэг салбараар Сайншанд сумын “Ноён Хутагтын Уяачид” морин спорт уяачдын холбоо шалгарч хагас сая төгрөгөөр мялаалгасан байна. Түүнчлэн сугалгаагаар Сайхандулаан сумын уугуул, аймгийн Алдарт уяач Г.Адъяасүрэн, Мандах сумын уугуул, аймгийн Алдарт уяач Д.Хашбат нар цэвэр цусны азарганд гүү хураалгах эрх, Сайншанд сумын уяачдын холбооны тэргүүлэгч Б.Батбаатар, оны шилдэг их насны  морины  эзэн М.Чинзориг, Сайхандулаан сумын уяач Х.Батсайхан нар тус тус азтанаар тодорчээ.

Дорноговь аймгийн “Хутагтын хүлэгч” МСУХ-ны тэргүүлэгч, Чанрав овогт Б.НОМУУНБАТ