Нийслэлийн цагдаагийн газрын дэд дарга А.Эрдэнэбаяр: 18 жилийн дараа улсын наадмаас анхны айргаа хҮртлээ

-Төрийнхөө баяр наадамд соёолон айрагдууллаа. Олон жилийн хүлээлт байх шүү?
-Баярлалаа. Тэгэлгүй яахав. Морь уяад 18 жилийн дараа төрийнхөө наадмаас анхныхаа айргийг хүртлээ. Тэгэхдээ хамгийн хийморьтой, иртэй гэдэг соёолон насаар. Монголчууд бид эрт дээр үеэсээ соёолон морьдыг шүтэж, тоосонд нь орохыг хүсч, бэлгэшээж ирсэн ард түмэн. Тэр утгаараа үнэхээр их баяртай байна. Дэлхийд ганцхан, дахин давтагдашгүй Монголын ард түмний их баяр цэнгэл өргөн дэлгэр сайхан боллоо.
-Хотын унаган хүү яагаад хурдан моринд хорхойсох болсон юм бэ?
- Миний аав Тэгшээгийн Аюурзана гэж Төв аймгийн Заамар сумын уугуул  морь, бөхөд дуртай хүн байсан. Тиймээс ч багадаа аавыгаа дагаад Яармагийн дэнжид наадамд үзнэ гээд 7-р сарын 7-ноос наадам дуустал уяачдын майхнаар хэсдэг хүүхэд байлаа. Ээж маань Төв аймгийн Лүн сумын хүн. Зуныхаа амралтаар ээжийн төрсөн дүү Одсэрийн Жамъяндорж гэж Улсын Алдарт уяачийнд очиж морь унана, хонь хариулна. Морь малын талаарх анхны мэдэгдэхүүнээ энэ хүнээс л авсан даа. Өөрөөр хэлбэл миний анхны багш нагац ах маань. Энэ хүнээр л анх морио уяулж, адууныхаа цусыг сэлбэж, улсын наадамд уралдахуйц хэмжээний болж уяач болж байлаа.
-Энэ жил хичнээн насанд морь уяж уралдуулсан бэ?
-Овоо хэдэн адуу уясан ч  явцын дунд зарим нэгийг нь тавьчихсан. Нэг шүдлэн маань Багануур дүүрэг үүсч байгуулагдсаны 30 жилийн ойд айрагдсан. Мөн Цэрэндорж гээд найздаа нэг даага бэлэглэсэн чинь тэр маань Төв аймгийн наадамд гуравт хурдалсан. Сая улсын наадамд айрагдсан зээрд үрээний дүү шүдлэн үрээ уг нь их хурдан байгаа ч би бага насанд нь уралдуулахыг чухалчилдаггүй учраас давхиулаагүй.
-Яагаад ?
-Яс үс нь сайн бэхжээгүй байдаг учраас бэртэл гэмтэл авах нь амархан юм шиг санагдаад. Шүдлэнгээс дээш настай болгож байж  л уях бодолтой байгаа.
-Улсын наадмын анхных ч бүсэд морь оруулж байсан биз дээ?
-Бүсийн наадмаас хоёр айраг авсаан.
-Ингэхэд ямар гал уяанд хамаардаг билээ?
-ЦЕГ-ын хурдан морины галыг 2002 онд байгуулж би өөрөө ахлагчаар нь сонгогдсон. Байгууллага ямар байдаг билээ. Түүн шиг л бүтэц зохион байгуулалттай, албан ёсны тамга тэмдэгтэй. Цагдаагийн байгууллагад ажилладаг болон тэтгэвэртээ гарсан хүмүүс нэгдэж хурдан морьдоо уяж байна. Зээрд үрээ маань сая ЦЕГ-ын нэр дээр уралдаж айрагдлаа.Би энэ байгууллагад 25 жил ажиллаж байна. Төрийнхөө сүлдийг тэргүүндээ залсан энэ өнөр айлын алдар цууг хурдан моринд оруулж, нэр төрийг нь өргөж яваадаа баяртай байдаг. Гал уяаныхан маань өмтэй сайхан наадлаа. Энэ дашрамд Монгол улсын цагдаагийн нийт бие бүрэлдэхүүнд баярын мэнд хүргэхийн ялдамд хамгийн сайн сайхан бүхнийг хүсэн ерөөе.
-Ерөөл бат оршиг. Бидний яриа өндөрлөж байна?
-Нар хур тэгширсэн сайхан цаг үед Монгол наадам маань шинэ бөх, шинэ морьд төрүүлэн,  үзэж харах, сонирхох зүйлээр арвин амжилттай болж өндөрлөлөө. Монголчууд маань ч сайн муу бүх л юмаа мартаад нааддаг ард түмэн. Хэд хоногоос бүсийн наадмууд болох гэж байна. Ард түмэн маань энэ бүх баяр наадмууддаа сайхан наадчихаад өвөл цаг хэцүү байдгийг санан   хадлан тэжээлийнхээ ажилд шуурхайлан орох байх.Та бүхэндээ амжилт хүсье.