Сэлэнгэ аймгаас гурван Алдарт төрлөө

ММСУХ-ны 2012 оны шилдэг салбараар шалгарсан Сэлэнгэ аймгийн “Буган халиун ажнай”морин спорт уяачдын холбоо энэ сарын 24-нд дээд гурван насны морьдын уралдааныг зохион байгуулж, "Товхон ханы буган халиун" түмэн эх хүлгийн дурсгалд зориулан босгосон хөшөөнийхөө нээлтийг хийсэн тухай бид өмнө нь мэдээлсэн. Энэ үеэр гурван ч аймгийн Алдарт уяач шинээр төрөн гарсан бөгөөд тэдгээрийг цол тэмдэгийг аймгийн Засаг дарга С.Бүрэнбат гардуулсан байна. Улиран одогч усан луу жилд одтой сайхан наадан аймгийн Алдарт уяач цолны болзлыг хангасан Сэлэнгэ аймгийн Сайхан сумын уугуул Ч.Гантулга бүсийн наадмын нэг түрүү, аймгийн баяр наадмын нэг түрүү, зургаан айргийн амжилтаараа, Сүхбаатар сумын уугуул, аймгийн уяачдын холбооны тэргүүн дэд тэргүүн Л.Ганбаатар аймгийн баяр наадмын хоёр түрүү, найман айргийн амжилтаараа, Цагааннуур сумын уяач Ж.Рэнчинбямба аймгийн баяр наадмын хоёр түрүү, найман айргийн амжилтаараа ийнхүү Алдарт уяачийн болзлыг хангажээ. Хөшөөний нээлт шилдэг салбарын мялаалга уралдаан давхцсан энэ баярт мөчид аймгийн Засаг даргын хүндэт жуухаар морин спорт уяачдын холбооны нарийн бичгийн дарга Ч.Лхагвасүрэн, түмэн эх “Товхон ханы буган халиун" морины хөшөөг урласан  “Хулсан чавх” компанийн Г.Энхтөр  нар шагнагдсан бол “Буган халиун ажнай” холбооны дэд тэргүүн М.Одмандах аймгийн ИТХ-ын хүндэт тэмдэгээр энгэрээ мялаалаа. Мөн Сэлэнгэ ИТХ-ын хүндэт өргөмжлөлөөр Мандал сумын “Мандал хүлэг” МСУХ-ны нарийн бичгийн дарга П.Гончигдорж, “Буган халиун ажнай” холбооны хүндэт өргөмжлөлөөр Г.Пүрэвдорж, Г.Бадарч, Ч.Жигжид, Р.Раднаадорж, Б.Баярхүү, А.Алтанхуяг нарын үе үеийн холбооны ажилтнууд шагнагдсан юм. Түүнчлэн “Сэлэнгэ түмний бахархал ажнай хурдан хүлгүүд” номыг бүтээгч, фото зурагчин Ч.Ганболдыг холбооны хүндэт өргөмжлөлөөр шагнагджээ.

А.Мөнх-Эрдэнэ Фотог Ч.Ганболд