Тод Манлай уяач Г.Сандуйжав 2000 онд “Дүү зээрд” азаргаа ийнхүү уяжээ

Ууган манлай уяачдын нэг Гарамжав гуайн адуу бол Жаргалант, Галшарын холимог бэсрэг угшлуудын бараг хамгийн эхнийх нь юм. Тэр угшлийн олон хурдан азарганы нэг нь “Дүү зээрд” билээ. Энэ азарга 1999 онд улсын наадамд их тарган уралдаж 6-д ороод, хэдхэн хоногийн дараа Баянжаргалангийн наадамд их хол түрүүлж байсан юм. Харин 2000 онд эртхэн тэжээж, хаврын 3 том уралдаанд амжилттай уралдуулжээ.
Үүнд, Түргэний голд том бооцоотой уралдаанд 4-т орж, Багануурт түрүүлж, 2 сарын 25-нд Баян суманд 5-д орсон байна. Үүний дараа тавьж, 3 cap гаруй амраагаад, сэргээн хаврын эдэлгээг нь зөв хийжээ.
Тэжээлийн хорыг нь тагнайлдаж, мөн 5 сард хоёр хасыг нь, дөрөөлөх, эсвэл ороо харыг нь хатгаж авдаг байна. Түүнчлэн гахайг нь сөхөж, тавагных нь цусыг авчээ. Гүүний opoor 5 сарын 20-доос өмнө тааруулж, хаврын салхинд 5-7 хоног байлгаад уул руу мацуулж, цөөхөн хөлс авч, сайн гишгүүлжээ. Ер нь гол онгойлт нь хаврын 3 уралдаан болсон байна. Ингээд VI сарын 11-нд барилаа.
6  дугаар сар
11 А 12 А 13 А 14 Х 15 А 16 Х 17 Т 18 Ханай 19 А 20 Х 21 Т 22 Т 23 Ханай 24 Х 25 ЭС 26 А  27 Х 28 Т 29 БС 30 А
7 дугаар сар
1 Х 2 Т 3 ДС 4 А 5 Х 6 Т 7 ИС 8 А 9 Х 10 Т 11* 12 А
Барьсны дараа эхний гурван өдөр буюу 11, 12, 13-нд амрааж, тэгэхдээ өдөр бүр баалгаад, гуравдах шөнөд нь уяж хоноод,  маргааш (14-ний) өглөө нь мулт хөлс авчээ. Хавар хэд хэд уралдсан, саяын хэд хоногт уясан учир энэ хөлс ширүүдсэнгүй. 15-нд амрааж, 16-нд зөөлөн хөлслөөд, 17-нд зөөлөн тар (500-600м) өгч, 18-нд 4-5 км газар харайлгасан байна.
Ийм зөөлөн уяанд бие нь зүдэрсэнгүй хөнгөрч, гэдэс нь холхиндог бус, бумба мэт хэлбэртэйгээ чангарч сэтгэл нь амгалан тогтуун болдог байна. 19-нд амраагаад, 20-нд хөлс авч, 21-нд 1 км газар ширүүхэн тар хийв. 22-нд мөн тарлаад 23-нд 4-5 км газар ханайлгажээ. 24-нд амрааж, 25-нд эрлийз сунгаа хийж, 26-нд амраагаад, 27-нд хөлс авч, 28-нд тар хийж, 29-нд бага сунгаа хийв. Энэ давхилд уяаны эв авч, давхил орж байгаа нь мэдэгдэж байв. Дараагийн гурван өдөрт нь ээлжийн ажлыг нь хийгээд 3-нд дунд сунгаа хийв. Дараагийн гурван өдөрт нь мөн ээлжийн ажлыг нь хийгээд 7-нд их сунгаа хийв. Энэ хоёр сунгааныг нэг их хол хийх нь гол биш, давхилыг нь эрчим, эмхрэлтийг харж байгаад хэмжээг нь тогтоов. 
Их сунгааны дараа мөн л ээлжийн ажлыг хийгээд 11-нд мордуулахад улсын их баяр наадамд түрүүлжээ.
Д.Сандуйжав уяач цааш нь адууны улирлын эдэлгээний талаар:
“Өвөл XII cap гаргаад дулаан шөнө, уядаг морийг авч хоно. Маргааш нь эмээллэж мордоод 4-5 км газар, салхины уруу шогшиж, өргөж ирээд тавь. Долоо хоногийн дараа адуун дээрээ барьж унаад 4-5 км шогшиж тавиад, долоо хоногийн дараа үүнийгээ давт. Тэгээд дөрөв дэх дээр нь задгай хөлс аваад цагаан сарын үеэс тэжээж эхлээрэй!
Тэжээх дундуураа буюу 4 сарын 20-дын үеэр уяж хоноод хөлс ав. Ингэхдээ өдрөө сайн ол, салхи цохичихгүй, дулаан өдөр бол зүгээр. Өвөл хавартаа хужир, шүү сайн өгч бай. Зун уяаны дундуур сөрж таргалах тохиолдол бий. Энэ бол ажил зөөлдсөнийх. Энэ үед усаар цохиулбал зүгээр, ер нь уяаны эхэнд хөөсрүүлэгчтэй усаар угааж болно” хэмээн ярьсан юм.