“Нарны хүлэг” уяачдын холбоо хурлаа хийж, шилдгүүдээ тодрууллаа

А.Тэлмэн
2013 оны 3-р сарын 11 -нд

Адуу айргаараа алдартай, дуу хуурын өлгий нутаг Дундговь аймгийн  “Нарны хүлэг” уяачдын холбооны V бага хурал өнгөрсөн баасан гаригт Луус суманд боллоо.  Сум бүрээс төлөөлөл оролцсон энэхүү хуралдаанаар “Нарны хүлэг” уяачдын холбооны  өнгөрсөн жилийн тайланг хэлэлцэж, бүтэц бүрэлдэхүүнийг сонгосон юм. Мөн бага хурлаар шилдэг уяач, унаач  хүүхэд болон өнгөрсөн жил аймгийн болон томоохон наадмуудад айраг түрүү хүртсэн азарга, их насны шилдэг таван хурдан ажнайг эрэмбэлж уяачдад нь батламж гардуулсан юм.
Нэг сумаас таван хүний төлөөлөл оролцсон тус бага хурлаар “Нарны хүлэг” уяачдын холбооны тэргүүнийг сонгох сонгуульд Дундговь аймгийн Засаг дарга асан Д.Чандмань, Луус сумын уяачдын холбооны тэргүүн Ш.Шинэбаатар, “Нарны хүлэг” уяачдын холбооны тэргүүн Ц.Ганхүү нарын нэрийг  хурлын төлөөлөгчид дэвшүүллээ. Харин Д.Чандмань, Ш.Шинэбаатар нар нэрээ татаж, Дундговь аймгийн “Нарны хүлэг” уяачдын холбооны тэргүүнээр Ц.Ганхүү улиран сонгогдсон билээ. Харин холбооны гүйцэтгэх захирлаар аймгийн ЗДТГ-ын орлогч дарга С.Энхбатыг, нарийн бичгийн даргаар С.Бат-Оргил нарыг тус тус сонголоо. Улаанбаатар хот, аймаг, сумдын төлөөлөл багтсан 45 тэргүүлэгч гишүүн дээр сумдын төлөөлөл болсон арван хүнийг нэмж 55 тэргүүлэгчтэй болсон юм. Хурлын явцад холбооны үйл ажиллагааг өргөжүүлэх, тэгш ой тэмдэглэх гэж байгаа зарим сумдын наадмыг аймгийн бүсийн наадам болгох хүсэлтэй төлөөлөгчид олон байсан юм. Харин аймгийн болон холбооны удирлагын зүгээс тэгш ойтой сумдын наадмыг аймгийн бүсийн чанартай болгох боломжгүйг онцолж байлаа.
Хурлын үеэр өнгөрсөн жилийн шилдгүүдэд шагнал гардуулсан. Луу жилийн шилдэг холбоогоор Дэрэн сумын уяачдын холбоо шалгарсан. Гэсэн ч Луус сумын уяачдын холбооны нарийн бичгийн дарга Х.Баатар “шударга бус байна” хэмээн шүүмжлээд авсан. Учир нь ММСУХ-ноос 2012 оны шилдэг салбар холбоогоор Луус сумын уяачдын холбоог шалгаруулсан атал аймгийн уяачдын холбоо үнэлэхгүй байгаад гомдолтой байгаагаа  хэлсэн юм. Харин аймгийн уяачдын холбооны зүгээс улсын шилдгээр тодорсон холбоонд аймгийн шилдгийг давхардуулж өгөхгүй гэсэн байр суурьтай байгаагаа илэрхийллээ.
Мөн өнгөрсөн жил гаргасан амжилтаараа бусдыгаа тэргүүлсэн Хулд сумын уугуул аймгийн Алдарт уяач Х.Дэмчигцоодолыг “Шилдгийн шилдэг уяач”-аар шалгарууллаа. 2012 оны “Нарны хүлэг” уяачдын холбооны шилдэг таван уяачдыг Сайнцагаан сумын уугуул аймгийн Алдарт уяач П.Одонбаатар манлайлсан бол Луус сумын уяачдын холбооны дарга “Говь хурх” компанийн захирал, аймгийн Алдарт уяач С.Шинэбаатар удааллаа. Мөн Дэлгэрхангай сумын уугуул, аймгийн Алдарт уяач Д.Оюунбат, Хулд сумын уугуул аймгийн Алдарт уяач Д.Баярсайхан, тус сумын Алдарт уяач Н.Батжаргал шилдэг уяачдын эгнээнд багтсан юм.  Энэ үеэр мөн шилдэг унаач хүүхдүүдийг шалгаруулсан. Үүнд: Өлзийт сумын Э.Одбал, Луус сумын О.Батболд, Адаацаг сумын Ү.Бум-Ялагч, Сайнцагаан сумын М.Жамьян, Сайхан-Овоо сумын Г.Содномдаржаа, Сайнцагаан сумын  нар шалгарлаа.

Дундговийн шилдэг  хурдан хүлгүүд   
Дундговь аймгийн “Нарны хүлэг” уяачдын холбооныхон өнгөрсөн жилийн шилдэг азарга, их насны морьдоо амжилтаар нь эрэмбэллээ. Үүнд:
Азарга
1. Сайнцагаан сумын уугуул, аймгийн Алдарт уяач М.Нямдаваагийн зэгэл хонгор
2. Өлзийт сумын уугуул, аймгийн Алдарт уяач Д. Эрболдын хүрэн
3. Хулд сумын Алдарт уяач Н.Батжаргалын зээрд халзан
4. Сайхан-Овоо сумын уяач Ч.Алтангэрэлийн  бор
5. Адаацаг сумын уугуул, аймгийн Алдарт уяач Х.Доржхоролын хээр
Их нас
1. Сайнцагаан сумын уугуул, аймгийн Алдарт уяач П.Одонбаатарын  бор
2. Луус сумын уугуул, аймгийн Алдарт уяач С.Шинэбаатарын хээр
3. Өлзийт сумын уугуул, аймгийн Алдарт уяач Д.Эрболдын  шарга
4. Луус сумын уугуул, аймгийн Алдарт уяач  Б.Чулуунбаатарын  хар
5. Сайнцагаан сумын Алдарт уяач Г.Мөнхбаатарын хул шилдгээр нэрлэгдлээ.

А.Дөл 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна