Баянхонгорчууд адууныхаа цус сэлбэх ажлыг эрчимтэй хийж байна

А.Тэлмэн
2013 оны 3-р сарын 28 -нд

Баянхонгор аймгийн “Хонгорын хурд” МСУХолбооны тэргүүн Д.Мөнх-Эрдэнэ нутгийхаа адууны цусыг сэлбэж, удам угшлыг сайжруулах зорилгоор сум болгоныхоо баг тус бүрт зүүн аймгийн хурдан удмын азарган үрээ өгөх ажлыг санаачлан эхлүүлээд  гурав дахь жилийнхээ нүүрийг үзэж байна. Баянхонгор аймгаас УИХ-д сонгогдсон Х.Баттулга, Д.Ганбат, “Хонгорын Хурд” МСУХ-ны тэргүүн Д.Мөнх-Эрдэнэ нарын ивээн тэтгэлэгээр хийгдэж байгаа энэ ажлын үр дүн сайн байгаад нутгийн уяачид сэтгэл хангалуун байгаагаа дуулгана билээ.
Хурдан удмын адуутай болоход уяачдын зүгээс нэг болзол хангасан байх ёстой гэнэ. Энэ нь түрүү жилийн сумынхаа баяр наадмын их насны морьдын уралдаанд тухайн багаас хамгийн өндөр амжилт үзүүлсэн уяач сонголт хийх эрхтэй болох ажээ. Өөрөөр хэлбэл болзол хангасан уяач нь өөрийн биеэр хурдны өлгий гэгддэг Сүхбаатар, Дорноговь, Хэнтий, Дорнод аймгуудад очиж газар дээрээс нь сонголтоо хийнэ. Улмаар сонгож авсан азарган үрээндээ өөрийн багийн уяачдын гүүг хураалгаснаар хонгор нутгийн адууны цус тодорхой хэмжээгээр сэлбэгдэн сайжрах учиртай ажээ.  Ийнхүү 2010 онд  Заг сумаас эхэлж байсан бол өнөөдрийн байдлаар 4 багийн уяачид болзол хангаж, Сүхбаатар аймгийн Түмэнцогт, Хэнтий аймгийн Баянхутаг сумдаас азарган үрээгээ сонгон авчраад байгаа аж. Эдгээ адуу нь ирсэн даруйдаа айраг түрүүнд уралдаад зогсохгүй одоо үр төлүүд нь ч гараад эхэлсэн байна. Мөн 2011 онд “Хонгорын шигшмэл хурд-2011” уралдааны үеэр Баян-Овоо сумынхан  цэвэр цусны Араб азарга, Богдынхон Оросын будённый үүлдрийн цэвэр цустай азарган үрээгээр адуундаа “бүл нэмжээ”.  Ер нь адуу хавар цагт шинэ нутаг, шинэ өвс ногоонд дасан идээшихэд тохиромжтой байдаг гэж уяачид үздэг. Тиймдээ ч  өнгөрсөн 7 хоногт Баянхонгор аймгийн 60 гаруй уяачид Хэнтий аймгийн Баянмөнх сумын уугуул Монгол улсын Алдарт уяач Содном болон түүний хүү Батсүх, мөн сумын Пүрэвчулуун, Мөнхмагнай, С.Золжаргал нарын унаган адуунаас азарган үрээгээ сонгон аваад байна. Баянмөнх сум нь улсын баяр наадмаас олон айраг түрүү авч байсан хурдны угшил сайтай газар тул ийнхүү онцлоод байгаа гэнэ. Содном Алдарт нь унаган адуугаараа одтой наадаж, монгол төрийнхөө наадмаас 7 айраг, түрүү авч асан хурдтай айл билээ. Үлдсэн Эрдэнэцогт, Галуут сумын уяачид ирэх 4 сард, Баянлиг, Хүрээмарал сумын уяачид ирэх жилийн хавар азарган үрээгээ сонгохоор аяны замд гарах төлөвлөгөө гараад байна.

“Хонгорын хурд” МСУХ

 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна