Дуудлага худалдаанд орох Макс угшлын адуунууд тодорлоо

Хурдан морины уяа сойлго тааруулах болсоор 20-иод жилийн нүүрийг үзэж байгаа ах дүү Тод манлай уяачид Д.Ганбаатар, Д.Цэрэнжигмэд нар өөрсдийн олон жилийн хөдөлмөрийн үр шимээр бий болсон Макс угшлын шинэ монгол адуу буюу эрлийз үрээ байдаснуудаа дуудлага худалдаанд оруулан хурд хуваахаар шийджээ. Энэхүү арга хэмжээнд зөвхөн Макс угшлын шинэ монгол адуунаас гадна ах дүү хоёрын нэртэй улс бүсийн наадамд түрүүлж, айрагдаж байсан хурдан азаргануудын үр төлүүд мөн дуудагдах аж.  Ах дүү Тод манлайгуудын улс бүсийн наадамд олон түрүү, айраг хүртэж байсан Асгат саарал, Сөнгө зээрд, Зандан хүрэн, Жигүүр хул, Шарга азарга, хар шилбэт зэрэг хурдан азаргануудын үр төл уг дуудлага худалдаанд оролцох гэнэ. Хурдан морь сонирхогч та бүхэн халхад алдар цуугаа дуудуулсан аварга хүлгэдийн үр төлийг үнэ хаялцан авч өөрийн адуун сүргийн удам, угшлыг сайжруулах боломж бүрдэж байна. Уг дуудлага худалдаагаар доорх хурдан удмын  үрээ, байдсуудыг дуудах нь.
1. Хүрэн эрлийз соёолон- Эцэг нь Будённый угшилтай оросоос орж ирсэн Бунт хээр азарганы төл. Энэ соёолон үрээ Говь-Алтайн даншиг наадамд зургаад хурдалж байсан бөгөөд эх нь улсад айрагдсан Арвай хээр азарганы удам Сохор хүрэн гүүний төл болно.
2. Халтар хавчиг үрээ- Эцэг Асгат саарал азарга нь улсын наадамд хоёр түрүүлж, нэг аман хүзүүдэн, Архангай аймгийн 80 жилийн ойн баяр наадамд түрүүлж, Их хурдад айрагдаж байсан хурдан буян. Харин эх нь МУ-ын Тод манлай уяач Д.Ононгийн шарга гүү. Халтар үрээний ах халтар азарга “Тамирын хурд-2” бүсийн уралдаанд шүдлэндээ түрүүлж, Хэрлэнгийн Хөдөө аралд болсон зүүн бүсийн уралдаанд айрагдаж байсан юм. 
3. Засаатай хул үрээ- Эх нь Дэлт хээрийн хамаатан халиун гүү. Дэлт хээр нь улс, бүсийн наадамд түрүүлж айрагдаж байсан хурдан буян. 
4. Улаан шарга соёолон- Эх нь халиун азарганы төл, халиун гүү. Эцэг Зандан хүрэн азарга нь улсын наадамд  гурвалж, Архангай аймгийн 80 жилийн ойн баяр наадамд түрүүлж байсан юм. 
5. Саарал даага-Эцэг нь Асгат саарал азарга харин  эх нь тогоруу хонгор гүү.
6.  Өсгий цагаан хул даага-.Эцэг Жигүүр хул азарга нь Өндөр гэгээн Занабазарын түмэн өлзий гийсний 370 жилийн ойн даншиг наадамд түрүүлж байсан. 
7. Зээрд байдас- Эцэг Оросын будённый үүлдэрийн зээрд азарганы төлүүд болох Сөнгө зээрд, Тэнхлүүн зээрд азарга улс, бүсийн наадмаас олон түрүү, айраг авсан.
8. Зээрд байдас-Эцэг Хар шилбэт азарга нь Чойрт болсон Боржигоны бүсийн уралдааны түрүүлж, Заамарын хурдад айрагдаж байсан.
9. Саарал байдас-Эцэг нь оросоос орж ирсэн Будённый үүлдрийн азарга, харин эх нь Жаргалант угшлын хул гүү.
10. Хар байдас- Эцэг нь Асгат саарал азарга, харин эх нь МУ-ын Алдарт уяач Э.Ганбатын хул гүү.
11. Шарга даага-Эцэг шарга азарга нь Архангайн 80 жилийн ойн наадмын шүдлэнгийн түрүү бөгөөд соёолондоо Өндөр гэгээний мэлмий гийсэний 370-н жилийн ойн  наадамд дөрвөлж, Багануурт болсон Дүнжингаравын хурд уралдаанд  аман хүзүүдэж байсан. Шарга азарганы төлүүд доорх амжилт гаргаж байсан. Шарга соёолон Архангайн наадамд айргийн гуравт, Өмнгөговийн наадамд аман хүзүүдсэн, дүү Шарга үрээ Говь-Алтай, Ховд аймгийн бүсийн уралдаанд олон түрүү, айраг хүртсэн. Эх нь Хар шилбэт азарганы төл. Хоёр талдаа удам сайтай.   
12. Хул үрээ- Эцэг нь Жигүүр хул азарга, эх нь Сүхбаатар аймгийн угшилтай.
13. Асгат саарлын угшилтай сүүтай даага, эхийн хамтаар.
Бид уг дуудлагын худалдааны талаарх мэдээллийг цаг тухайд нь хүргэх болно.
А.Мөнх