Морины хорхойтой моделиуд

А.Тэлмэн
2013 оны 5-р сарын 07 -нд

Топ моделиуд... Тэд бүгд нэр алдартай, баян чинээлэг, ямагт олны анхаарлын төвд, завгүй  амьдрах хүмүүс. Гэхдээ тэд  яаж ийж байгаад хоббиндоо цаг гаргадаг. Энэ удаад моринд хоббитой оддыг сонирхуулж байна.
Кейт Мосс
Загварын шүүмжлэгч, дизайнеруудын хамгийн “дуртай” моделиудын нэг Кейт Мосс энэ жил 39 нас хүрсэн. Загварын тайзнаа алхахад арай “хөгшдөж” мэдэх ч тэрээр дэлхийн нэр хүнд бүхий сэтгүүлүүдийн нүүрэнд гарч, хамгийн дуулиантай загварын шоунуудад оролцсон хэвээр л байна. Сайхан бүсгүйчүүд хоосон толгойтой гэж ойлгодог зарим нэгний муйхар ойлголтыг саяхан тэрээр төвөггүй үгүйсгэж, цөмийн физикчтэй ярилцахдаа квант физикийн талаар ярилцан олны нүдийг орой дээр нь гаргаад авсан. Тэрээр бас хурдан морины тухай хэнийг ч ангайлгаж мэдэх нэгэн. Чөлөөт цагаараа морь унаж зугаалах дуртай топ бүсгүй “Louis Vuitton”-ий нэгэн шоун дээр морь унан гарч ирж гэнэтийн бэлэг барьж байлаа.
Клаудия Шиффер
17 наснаасаа л загвар өмсөж эхэлсэн тэрээр 19-тэйдээ “Cosmo” сэтгүүлийн хавтсан дээр зургаа гаргуулж чадсан адтай нэгэн. Үүнээс хойш тун удалгүй дэлхийн хэмжээний супер од болж “Versace”, “Victoria’s Secret”, “Chanel”, “Fanta”, “Guess” , “L’Oreal” гэхчилэн супер брэндүүдтэй хамтран ажиллах болсон билээ. Түүний зургаар нүүрээ чимсэн сэтгүүлийн тоо хэдийнэ өдгөө 900 хол давж загварын ертөнцийн дээд амжилтыг тогтоосон юм. Тэрээр хурдан морины уралдаан, полоны тэмцээнүүдийн үнэнч үзэгч. Нэгэн удаа хунтайж Уильямын оролцсон пологийн тэмцээнийг үзэж байхдаа хунтайжид тусгай шагнал гардуулж байсан юм.
Кристи Бринкли
Америкийн хамгийн алдартай загвар өмсөгчдийн нэг энэ бүсгүй 500 гаруй сэтгүүлийн нүүрэнд гарсан байдаг юм. Фото зураг, сэтгүүл зүй, дизайн, үнэт эдлэл гээд олон салбарт хүчээ үзэж яваа түүний хөрөнгийг 2008 онд 80 сая ам.доллараар үнэлж байлаа. Тэрээр өдгөө 59 настай хэдий ч охиноосоо залуу харагддаг гэлцдэг. Чөлөөт цагаараа морь унана, бас каттингээр тогтмол хичээллэдэг. /каттинг гэдэг нь морин спортын вестерн чиглэлийн нэгэн төрөл юм/ Энд морь ковбой нь сүрэг бухандайгаас нэгийг нь таслан салгаад талбайн төв хэсэгт зөвхөн мориор хашин тодорхой хугацаанд хорьж байлгах зорилготой. Бринкли нь 1990-ээд онд каттинг сонирхогчдын клуб байгуулсан эмэгтэй билээ.
Жизель Бундхен
33 настай Бундхений дэлхийн хамгийн үнэтэй загвар өмсөгч гэдэг. Тэрээд одоо өөрийн гэсэн “Ipanema” брэндийн гуталыг гаргаж, өөрийн нэрийн зоогийн газрын сүлжээтэй. Бас  НҮБ-ын сайн санааны элч, “Versace”, “Esprit”, “Panten” гэсэн алдартай брэндүүдтэй хамтран ажилладаг. Тэрээр хүүхэд байхаасаа л морь унаж өссөн нэгэн. Ранчо буюу эдлэн газар ковбойчуудад үхэр хариулахад нь туслан өдөржин морь унадаг байсан төдийгүй нутгийн родео буюу эмнэг сургах уралдаанд хүртэл оролцдог байжээ. Хожмоо нэр алдартай болсон ч конкурээр хичээллэж, тусгайлан морь худалдан авч байсан юм.
Кармен Электра
Кармен Электрагийн жинхэнэ нэр нь Тара Патрик. Энэ бүсгүй загвар өмсөгч, жүжигчин, дуучин, ток шоуны хөтлөгч, тураах чиглэлийн өөрийн гэсэн дасгалын чиглэлийг үндэслэгч. Морь унаж сурталчилгаанд тоглох дуртай тэрээр чөлөөт цагаа моринд зориулах нь олонтаа. Үүнийгээ морь стресс тайлдаг хэмээн тайлбарладаг.
Сиенна Миллер
Нэр алдартай олон сэтгүүлийн нүүрийн чимсэн жүжигчин, загвар өмсөгч энэ бүсгүй “Coca Colа”, “Prada” гээд алдартай компаниудтай хамтран ажилладаг. “Ярилцлага”, “Камиллагийн бал сар” гэх зэрэг кинонд тоглож байсан тэрээр цэнхэр өнгөтэй гүү, гал улаан үсээр нэгэнтээ гоёж олныг гайхуулж байлаа.

Д.Бадрал

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна