Унаач Б.Баасандорж: Зээрд азаргатайгаа улсын наадмын хоёр дахь айргаа авлаа

Үндэсний их баяр наадам, Их монгол улс байгуулагдсаны 807, Ардын хувьсгалын 92 жилийн ойн баяр наадамд Дундговь аймгийн Алдарт уяач Цэлхээгийн Бямбасүрэнгийн унаган зээрд азарга айргийн гурваар хурдалсан билээ. Энэ  азаргыг 1179 дугаартай, 8 настай Б.Баасандорж хүү унаж, 36,07,51 долл хурдлуулан хурсан олон наадамчин, уясан эзнийг нь баярлуулсан юм. Ингээд бяцхан унаачтай ярилцсанаа хүргэж байна.
-Миний дүү сайхан наадаж байна уу?
-Сайхаан. Та бүхэн сайхан наадаж байна уу?
-Сайхан наадаж байна. Зээрд азаргаа айргийн гурваар хурдлууллаа шүү. Баярынхаа сэтгэгдлээс хуваалцаач?
-Үнэнхээр гоё байлгүй яахав. Зээрд азаргатайгаа улсын наадмын хоёр дахь айргаа авч байна. Ноднин аман хүзүүнд давхиулаад энэ жил айргийн гурваар орлоо. Төв цэнгэлдэхэд морио цоллуулах үнэхээр гоё байдаг юмаа.
-Хэдэн настай билээ?
-Найман настай. Одоо дөрөвдүгээр ангид орно.
-Хурдан морь унаад хичнээн жил болж байна вэ?
-Гурван жил болж байгаа.
-Дундговь аймгаасаа хэдүүлээ ирсэн бэ?
-Шүдлэн, азарга, соёолон насны гурван морьтой ирсэн. Би энэ жилийн улсын наадмаар гурван насны морь унаж байна.
-Ярилцсанд баярлалаа.

П.Ундраа