Хоёр бүсийн хишигт М.Энхбатын халтар

А.Тэлмэн
2013 оны 8-р сарын 07 -нд

Засгийн газрын тогтоолт хоёр ч бүсийн наадамд айрагдан уясан эзэн, унасан хүүхдээ баярлуулсан Төв аймгийн Баянцагаан сумын уугуул Мөрнэрэнгийн Энхсайханы халтар азарга Тулгар төр байгуулагдсаны 2222 жилийн ойн баяр наадамд долоод хурдаллаа. Даагандаа Алтан-Овооны их тахилга наадамд айргийн дөрвөөр давхиж байсан энэ хурдан буян Сүхбаатар аймгийн Дарьганга сумын уугуул Чүлтэмийн Чулуунбаатарын унаган адуу. Дээд удмыг нь хөөвөл тус сумын уугуул Шарын Бүдүүний  сумынхаа наадамд олон түрүүлж айрагдсан хурдан хээр азарганы төл хар азарганы үр юм. Чулуунбаатарын хүү Төмөрбаатар тус сумын уугуул Д.Дугарсүрэнгийн хүү Бямбасүрэнтэй багаас нөхөрлөсөн андууд. Халтар азаргыг унага байхад нь Төмөрбаатар найз Д.Бямбасүрэндээ бэлэглэжээ. Аймгийн Алдарт уяач  Д.Бямбасүрэн бэлэгний үрээгээ уяж, сумынхаа наадамд түрүүлгэн, Алтан- Овооны тахилгат дөрвөөр давхиулсан бөгөөд тэр намар нь одоогийн эзэн Мөрнэрэнгийн Энхбат нь авчээ. Халтар үрээ хязааландаа Төв аймгийн наадамд таваар давхиж, соёолондоо “Сэргэлэн хурд-2011” уралдаанд түрүүлэн,  “Дүнжингаравын хурд-2011” хаврын бүсийн уралдаанд айргийн гуравт хурдалсан юм. Тэр жилээ улсын наадамд 20 гарган давхиж, 2012 он гарсаар Дүнжингаравын хурд уралдаанд 14-өөр давхисан бол энэ жил “Эрдэнэт  хурд” хаврын бүсийн уралдаанд аравт хурдалжээ. Халтар азарганы уяаг Төв аймгийн Баянцагаан сумын уугуул, аймгийн Алдарт уяач Шийрэвийн Төмөрхуяг тааруулдаг билээ. Дашрамд сонирхуулахад халтар азарганы дүү халтар үрээ өдгөө сумандаа уягдаж байна.

А.Тэлмэн

 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна