Унаач Б.Эрдэнэхүү: Айрагдах нь тодорхой болоход аав руугаа л их яарсан

Их монгол улс байгуулагдсаны 807, АХ-ын 92 жилийн ойн баяр наадамд Увс аймгийн Зүүнговь сумын уугуул Ц.Баярхүүгийн цавьдар хязаалан айргийн дөрвөөр хурдалсан билээ. Цавьдар үрээг Ц.Баярхүү уяачийн хүү Б.Эрдэнэхүү 026.37.64 долл хурдлуулан унаачийнхаа  хувьд улсын наадмын анхны айргаа хүртсэн юм. Ингээд бяцхан унаачтай ярилцсанаа хүргэж байна.
-Улсынхаа баяр наадамд цавьдар хязаалангаа айрагдууллаа. Баярынхаа сэтгэгдлээс хуваалцана уу?
-Гоё байнаа. Сэтгэл өндөр байна. Улсын наадамд гурав дахь жилдээ уралдлаа. Үүнээс анх удаа улсын наадмаас айраг хүртсэндээ үнэхээр их баярлаж байна.
-Аль сургуулийн хэддүгээр ангид сурдаг вэ?
-Би Төв аймгийн Баянчандмань сумын 11 жилийн дунд сургуулийн Янжинхорлоо багштай тавдугаар ангид сурдаг.
-Сурлага өндөр биз дээ? Ямар хичээлдээ илүү сонирхолтой вэ?
-Хичээл ном дажгүй шүү. Би биеийн тамирын хичээлдээ их дуртай. Ер нь спортод сонирхолтой.
-Танай ангид унаач хүүхдүүд олон уу?
-Тийм шүү, долоо, найман хүү бий. Бас манай хамаатны Батука хурдан морь унадаг. Бид уулзахаараа унасан морьд, уралдсан уралдааныхаа сонин хачныг хааяа ярьдаг юм.
-Тэгвэл хурдан морь хэзээнээс эхэлж унаж байна вэ? 
-Анх ахаараа заалгаж морь унаж сурч байлаа. Манай ах Эрдэнэбилэг багадаа хурдан морь унадаг байсан юм. Ах маань олон айраг түрүүтэй унаач явлаа. Очсон наадам болгоноосоо л айраг түрүүтэй ирдэг байсан.
Харин миний хувьд тав дахь жилдээ морь унаж байна. Ихэвчлэн аавынхаа уясан морьдыг унаж хурдлуулдаг.
-Энэ хугацаанд хичнээн айраг түрүү авсан бэ?
-2011 онд “Увс хурд 2011” баруун бүсийн даншиг наадамд аавынхаа уясан хээр соёолонг айргийн гурваар хурдлуулж байлаа. Тэгэхэд би аавынхаа уясан хязаалан, шүдлэнг, бас нэг хүний азарга унаж уралдсан юм. Харин энэ он гарсаар хаврын Сэлэнгийн бүсэд их морь таваар давхиулсан. Үүнчлэн бага наадмуудаас авсан айраг түрүү нэлээд бий.
-Морь унаж уралдахад хамгийн гоё нь юу байдаг вэ?
-Мэдээж  айраг түрүүнд хурдлуулах гоё л доо. Уралдах болоход өөрийн эрхгүй л сэтгэл хөөрөөд байдаг юм. Энэ жил төв цэнгэлдэхэд орж морио цоллуулахад сайхан байсан шүү. Уралдахын өмнө битүүхэндээ сандарч байсан ч айрагдах нь тодорхой болоход аав руугаа л их яарсан. Айрагдаад ороод ирэхэд сэтгэл нь хөөрсөн аав маань өндөр гэгч нь өргөөд үнссэн.
-Эрдэнэхүү унаач том болоод ямар мэргэжилтэй хүн болох вэ?
-Аав маань уяач хүн. Тийм болохоор би удам дагасан уяач болно гэж бодож байгаа. Уясан морьдоо айраг түрүүнд хурдлуулчихаад хөлсийг нь хусаж зогсох уяачид цаанаа л гоё санагддаг юм.
-Ярилцсанд баярлалаа. Хүсэл мөрөөдлөө биелүүлж алдар нэрээ дуудуулсан сайн уяач болоорой.

П.Ундраа