Баруун бүсийн хурдан хүлгэд

Үндэсний өв соёлоороо бахархаж, Монголоороо омогшихын сэтгэлийг дэврээсэн баярт өдөрлөг дэлхийн адууны баяр өнгөрсөн сарын 9,10-нд Хүйн долоон худгийн торгон дэнжнээ болсон. Монголд адууны яам үүсч байгуулагдсаны 750 жилийн ойн арга хэмжээний хүрээнд зохион байгуулагдсан "Монгол морь-3000" 4249 хүлгийн уралдааны БАРУУН бүсэд  түрүүлж, айрагдсан хурдан хүлгэдийг танилцуулъя.
1.Завхан аймгийн Яруу сумын уугуул, МУ-ын Алдарт уяач  Д. Дагвадоржийн өсгий цагаан хүрэн. Завхан аймгийн 90 жилийн ой баруун бүсийн даншиг наадамд аман хүзүүдсэн хүрэн морь "Монгол морь-3000" уралдаанд 23-т хурдалсан ч баруун бүсдээ тэргүүлсэн юм.
2. Ховд аймгийн Алтай сумын уугуул МУ-ын Алдарт уяач Ц.Гантөмөрийн бор. 4249 мориноос 29-д хурдалж, баруун бүсдээ аман хүзүүнд баригдсан бор морь  2011 онд Сэлэнгэ аймгийн 80 жилийн ой болон Дундговь аймгийн 70 жилийн ойд цулбуур өргүүлж байсан хурдан буян юм.
3. Завхан аймгийн Эрдэнэхайрхан сумын уугуул, МУ-ын Алдарт Б.Энхболдын бор. Төрийнхөө наадамд их морь түрүүлгэж байсан энэ хийморилог эрхэм бор морио аймгийнхаа 90 жилийн ойгоор арав гаргаж давхиулаад Гиннест бүртгүүлэх түүхэн уралдаанд ийнхүү бүсдээ айрагдуулсан юм.
4. Говь-Алтай аймгийн Халиун сумын уугуул, МУ-ын Алдарт уяач Т.Гантөмөрийн бор. Сүхбаатар аймгийн Онгон сумын унаган хүлэг бор морь 33-т хурдлан, бүсдээ айргийн дөрвөөр баригдсан юм.
5. Завхан аймгийн Яруу сумын уугуул, МУ-ын Алдарт уяач Д.Дагвадоржийн бор. Могой жилийн уралдаануудад одтой наадаж буй Алдартын бор морь 35-д хурдалж, баруун бүсээс айргийн тавд багтсан юм.
А.Мөнх