УЛААНБААТАР бүсийн хурдан хүлгэд

А.Тэлмэн
2013 оны 9-р сарын 23 -нд

"Монгол морь-3000" уралдааны Улаанбаатар бүсээс 324 хурдан хүлэг гараанаас гарч, Төв аймгийн уяачид нэг түрүү, гурван айргийг нь хүртсэн юм. Ингээд тус бүсийн хурдан ажнайгуудыг танилцуулъя.
1.
Төв аймгийн Сэргэлэн сумын уугуул, С.Эрдэнэбатын буурал бүсдээ тэргүүлж, тод магнай торгон жолоогоо өргүүлсэн. Төв аймгийн түүхт 90 жилийн ой, төвийн бүсийн наадамд аман хүзүүдсэн энэ хурдаж ажнай Хэнтий аймгийн Галшар сумын уугуул Мягмарсүрэнгийн унаган адуу гэдэг юм билээ.
2. Төв аймгийн Баянцогт сумын уугуул "Босоо хүлэг" галын уяач М.Цэрэнжавын халтар нийт уралдсан 4249 мориноос 15-д хурдалж Улаанбаатар бүсэд аман хүзүүдсэн.
3. Төв аймгийн Баянжаргалан сумын уугуул, "Агт-Эрдэнэ" галын гишүүн Б. Саранхүүгийн хээр халзан 4249 мориноос 16-д хурдалж бүсдээ айргийн гуравт баригдсан. Даагандаа Төв аймгийн наадамд түрүүлж байсан энэ хүлэг өнөө жил Баянжаргалан сумын 90 жилийн ойд аман хүзүүдэн, төвийн бүсийн наадамд айргийн таваар давхисан билээ.
4. Улаанбаатар хотын Хан-Уул дүүргийн харьяат Г. Лувсандагвын бор хээр. Нийт уралдсан 4249 мориноос 17-д хурдалж бүсдээ айргийн дөрөвт багтсан юм.
5. Төв аймгийн Баян-Өнжүүл сумын уугуул Ч.Батбадрахын ухаа халзан. АХ-ын 90 жилийн ойгоор айргийн гуравт хурдалж байсан энэ хурдан хүлгийн уяа сойлгыг "Агт-Эрдэнэ" галын уяач Г.Буянтогтох тааруулдаг бөгөөд МУ-ын Манлай уяач Л.Чойдог агсаны хурдан хонгор азарганы төл хэмээдэг.

А.Мөнх

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна