Унаач М.Түвдэнням: Улс бүсийн наадмаас 3 түрүү, 6 айрагтай

А.Тэлмэн
2013 оны 9-р сарын 23 -нд

...Хурдан морины хүүхэд
Хувцас нь хүртэл содон
Хуй салхи шиг эрчлэх
Тоосон дундаас тодхон... хэмээн яруу найрагч Л.Төмөрбат “Хурдан морины хүүхэд” дуундаа шүлэглэсэн нь бий. Дэлхийд ганцхан монгол наадмын чимэг болсон бяцхан унаачид бол “Тод магнай”-н хүндтэй зочдын нэг билээ. Энэ удаад тэр л хүндтэй зочдын нэг нь 10 настай Мөнхбаатарын Түвдэнням байлаа. АХ-ын 92 жилийн ойн баяр наадмын хязаалангийн уралдаанд Төв аймгийн Сэргэлэн сумын уугуул Б.Сүхбаатарын Дүү хээрийг айргийн таваар хурдлуулсан тэрээр одоогоор улс бүсийн наадмаас гурван түрүү, зургаан айрагтай болоод байгаа юм.
-Сэтгүүлийн маань уншигчдад өөрийгөө танилцуулна уу?
-Намайг М.Түвдэнням гэдэг. Би Төв аймгийн Зуунмод сумын дөрөвдүгээр сургуулийн тавдугаар ангид сурдаг.
-Хурдан морь унаад хэдэн жил болж байгаа вэ?
-Дөрөв дэх жилдээ хурдан морь унаж байна. “Ажнай шарга” галынхаа уяач ах нарын морьдыг унаж уралддаг юм.
 -“Ажнай шарга” гал олон унаач хүүхэдтэй юу?
- Манай галд Батхишиг, Түвшээ нарын дөрөв, таван хүүхэд бий.
-Энэ жил наадмаар хэдэн насны морь унасан бэ?
-Зургаа, долоон насны морь унасан. Үүнээс Сүхээ ахынхаа Дүү хээрийг айрагдуулсан. Бусад нь 20, 60 гаргаад л ирсэн дээ.
-2013 он гарсаар ямар ямар амжилт гаргаад байна вэ? 
-“Дүнжингаравын хурд 2013”, “Эрдэнэт хурд 2013”-т тус тус уралдаж айрагдуулсан. Түүний дараа улсын наадамд оролцоод, “Их хурд 6”-д уралдаж, Төв аймгийн 90 жил төвийн бүсийн уралдаанд Сүхээ ахын хязаалан үрээг наймаар хурдлуулсан.
-Хурдан морь унахад хамгийн гоё нь юу байдаг юм бэ?
-Мэдээж  түрүүлэх шүү дээ. Салхи сөрөн давхиж байх их гоё санагддаг юм. За тэгээд мэдээж цоллуулах  бас их гоё мэдрэмж төрүүлдэг.
-Хэр шартай вэ?
-Шартай шүү. Мэдээж заримдаа хойгуур давхичихаад сэтгэл гонсгор үлдэх нь үе гарна ш дээ. Гэхдээ тэр бүхэн дараа дараагийн уралдаанд сургамж болдог юм байна лээ.
-Ярилцсанд баярлалаа. Дүүгийнхээ сурлагат өндөр амжилт хүсье.

П.Ундраа

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна