16 жил хүлээсэн Түмэн эх

Их монгол улс байгуулагдсаны  807, АХ-ын 92 жилийн ойн баяр наадамд түрүүлж айрагдсан хурдан хүлгэдийн удам хийгээд амжилтыг цувааг уудалбаас ийн байх ажээ. Энэ удаад бид шүдлэнгийн уралдаанд түрүү магнайд хурдалсан Сэлэнгэ аймгийн Баруунбүрэн сумын уяач Д.Одхүүгийн зээрд шүдлэнгийн тухай тэмдэглэлээ хүргэж байна.
2013 оныг уяачийн ёс зүйн жил болгон зарласан ММСУХ усан могой жилийн анхдугаар уралдаанаас эхлэн зорилгоо хэрэгжүүлж буй. “Дүнжингаравын хурд 2013”хаврын бүсийн анхны уралдаанаас эхэлсэн энэхүү буухиа төрийн их баяр цэнгэл наадмын үеэр ч хэрэгжиж, тохирсон ангилалдаа уралдаагүй морьдын амжилтыг тооцохоос татгалзсан юм.
Ингээд шүдлэнгийн түрүү магнайгаар Сэлэнгэ аймгийн Баруунбүрэн сумын уугуул Д.Одхүүгийн хээр шүдлэн тодорсон билээ. Хээр үрээ Д.Одхүүгийн өвөг эцэг МУ-ын Аварга малчин Жамъяндоржийн унаган адуу бөгөөд эцэг талаасаа хурдан хээрүүдийнх нь харин эх талаасаа Гаа хэмээх Дагвадоржийн хурдан саарлуудын угшилтай хэмээдэг. Хоёр талаас хурдны цустай хээр үрээг шүдлэнд нь буюу энэ хавар сурган уяж хөнгөрүүлэхэд наадмын өмнөх сунгаануудад тогтмол өнгөнд хурдалж басйан гэх юм билээ.
Төрийнхөө их баяр цэнгэлд түрүүлж, түмэн эхээ дуудуулсан залуу уяач Д.Одхүүгийн хээр 16 жилийн дараа Баруунбүрэнчүүдэд төрийн наадмын түрүүг авчирч буй бөгөөд 1997 онд Отгонбаатарын хар даага улсын наадамд түрүүлж байсан билээ. Төрийн наадмын хишигт Д.Баясгалангийн Суман хүрэн морины нутгийн хээр шүдлэн хэдхэн хоногийн дараа болсон Төв аймгийн 90 жилийн ой буюу төвийн бүсийн уралдаанд магнайдаа тоосгүй тэргүүлснийг мөн дуулгах нь зүйтэй байх.

А.Мөнх