Заануудын барилдаанд Ч.Санжаадамба түрүүлж, зааны дүү начин Б.Пүрэвсайхан үзүүрлэлээ

Бидний нэрлэж заншсанаар Орхон аймаг, албан ёсоор бол Орхон-Уул аймгийн Эрдэнэт хотод энэ Бямба гарагт “Монгол улсын заануудын нэрэмжит” барилдаан боллоо. Барилдаанд у.з Ч.Санжаадамба, Б.Батмөнх, у.х Ө.Даваабаатар, у.х Н.Батсуурь, у.х Э.Оюунболд нарын хүчит 96 бөх барилдав.
Барилдааны 2-ын даваанд Архангай аймгийн шинэ начин Жаргалсайханы Цэрэндаваа у.н Н.Батзаяаг дахин өвдөг шороодуулжээ. Саяхан болсон нэгэн барилдааны 2-ын даваанд мөн таарч давсан билээ. Мөн а.н Б.Тайван а.а Б.Баатарцолоор хоёр давсан байна.
Гурвын даваанд у.х Г.Алтангэрэл нутгийн бөх а.н Б.Тайванг хонгодоод, у.х Н.Батсуурь а.а Б.Уртбаярыг давхар шуудагны барьцнаас суганд сэжиж түрж хөөгөөд, у.х Э.Оюунболд а.а Н.Батсайханыг мордоод, у.н Ц.Одбаяр а.а Д.Амарсайханыг таллаж тахимдаад, у.н Б.Пүрэвсайхан а.а О.Хангайг хөлд нь орж цацаад давсан бол а.з Б.Бадамсүрэн у.ө.и.н Ж.Отгонбаярыг сэнжигний барьцнаас зайлж сунгаж татаад, а.а Б.Эрдэнэхүү у.н Ч.Цогбаярыг давхар шуудагдсан барьцнаас баруун хутгаж зүтгээд, тунасан а.а Л.Лха-Очир у.н Т.Баасанхүүг сугадаж мордоход дагуулж мушгиад тус тус өвдөг шороодуулжээ.
Дөрвийн даваанд а.з Б.Бадамсүрэн у.з Ч.Санжаадамбыг нааж хавирсан ч өөрөө өвдөглөж, у.з Б.Батмөнх а.а Б.Эрдэнэхүүгээс барьц сонгож давжээ. А.а Л.Лха-Очир у.х Ө.Даваабаатарыг сэнжигнээс тойруулж татаад, у.н Ц.Одбаяр у.х Н.Батсуурийг зайлж татаад давжээ.
Бөхийн барилдааны тавын даваанд зүүний магнай заан а.а Л.Лха-Очирыг амлаж нааж хавирах мэхээрээ давсан бол барууны магнай заан Б.Батмөнхийг залуу начин Ц.Одбаяр давхар шуудагны барьцнаас давхар тохоод, угсруулж нааж хавираад дутуудангууд нь хутгаад давжээ. Тунасан хоёрын барилдаанд начин тахимдаад давсан байна.
Их шөвөгт заан гоц мөргөж хоёр начин хүч үзсэн бөгөөд Ц.Одбаярыг татаж хавирахад Б.Пүрэвсайхан дагуулж тахимдаад давсан байна.
Үзүүр түрүүний барилдаанд Ч.Санжаадамба заан давхар шуудагдсан барьцнаас суганд нь сэжиж түрээд давснаар халхын хаана ч очсон довтойгоо харуулан түрүүлжээ. Тэрээр саяхан Төв аймагт болсон Данзаннямын Даваахүү гуайн “Хөдөлмөрийн баатар” цолны мялаалга наадамд у.х Ө.Даваабаатартай үлдэн түрүүлсэн билээ.
Дүйзийг гурвын даваанаас сонирхоно уу.

Гурвын даваа
1. Ч.Санжаадамба у.з – С.Эрдэнэсайхан а.з
2. Б.Батмөнх у.з - Ж.Цэрэндаваа а.н
3. Ө.Даваабаатар у.х – Ш.Дарханбат а.а
4. Г.Алтангэрэл у.х – Б.Тайван а.н
5. Н.Батсуурь у.х – Б.Уртбаяр а.а
6. Э.Оюунболд у.х – Н.Батсайхан а.а
7. Ж.Отгонбаяр у.ө.и.н – Б.Бадамсүрэн а.з
8. Б.Заяамандах у.н – Т.Занданбат а.а
9. Ч.Цогбаяр у.н – Б.Эрдэнэхүү а.а
10. Ц.Одбаяр у.н – Д.Амарсайхан а.а
11. Б.Пүрэвсайхан у.н – О.Хангай а.а
12. Т.Баасанхүү у.н – Л.Лха-Очир а.а

Дөрвийн даваа
1. Ч.Санжаадамба у.з – Б.Бадамсүрэн а.з
2. Б.Батмөнх у.з - Б.Эрдэнэхүү а.а
3. Ө.Даваабаатар у.х – Л.Лха-Очир а.а
4. Г.Алтангэрэл у.х – Б.Пүрэвсайхан у.н
5. Н.Батсуурь у.х – Ц.Одбаяр у.н
6. Э.Оюунболд у.х – Б.Заяамандах у.н

Тавын даваа
1. Ч.Санжаадамба у.з – Л.Лха-Очир а.а
2. Б.Батмөнх у.з – Ц.Одбаяр у.н
3. Э.Оюунболд у.х – Б.Пүрэвсайхан у.н

Зургаагийн даваа
1. Ч.Санжаадамба у.з – гоцлов.
2. Ц.Одбаяр у.н – Б.Пүрэвсайхан у.н

Долоогийн даваа
1. Ч.Санжаадамба у.з – Б.Пүрэвсайхан

Тэмдэглэсэн МУИС-ийн оюутан Т.Түмэндэмбэрэл

Мэдээллийг Х.Сабит