Ерөнхийлөгчийн хийморь-Эрдэнэ хээр

Монгол улсын Ерөнхийлөгч Цахиагийн Элбэгдоржийн хээр үрээ АХ-ын 92 жилийн ой, төрийн их баяр цэнгэл наадмын эрлийз дунд насны ангилалд түрүүлж, тод магнай торгон жолоогоо өргүүлсэн. Монгол төрийн наадамд зургаантаа түрүүлж, Амгалан төрийн ажнай шарга хэмээх эрхэм цолыг хүртсэн шандаст хурдан хүлгийн төл хээр үрээний эх нь Англи, Будённый үүлдрийн гүү байдаг гэдэг. АХ-ын 90 жилийн ойгоор Ажнай шарга албан ёсоор зодог тайлж, түүнийг нь өдгөөгийн Ерөнхийлөгч Ц.Элбэгдорж ёсчилж байсан билээ. Энэхүү түүхэн үйл явдлыг тохиолдуулан Б.Наранхүү гишүүн төрийн тэргүүнд шарга азарганы төл хээр даагыг бэлэглэсэн бөгөөд уяаныхан нь Элбэг хээр хэмээн нэрийдэх болжээ.
Элбэг хээр өнгөрсөн хавар  эцэг шарга азарга, эзэн Ц.Элбэгдоржийн хамт  сонгуулийн сурталчилгаанд тоглон морь сонирхогчдын эчнээ танил болсон бөгөөд энэ жилээс уягдан төрийн наадмын түмний эхээр тодорсон нь энэ юм.
Сурталчилгааны зураг авалтын үеэр төрийн тэргүүн хээр үрээнийхээ нэрийг өөрчлөхийг хүссэний дагуу  улсын наадамд Эрдэнэ хээр нэртэйгээр мордсон билээ.
Төрийн тэргүүний хиймор дагаж хурдалсан Эрдэнэ хээр түмэн олноо цэнгүүлсэн олон түрүүг авчрах болтугай.

А.Мөнх