Хурдан морины дуудлага худалдаа ирэх сарын 7-нд болно

Макс угшлын адуун сүргийн ээлжит дуудлага худалдааг 2013.12.07-ны Бямба гарагт зохион байгуулах гэж байна. Дуудлага худалдаагаар худалдаанд дуудагдах адууны эхний хэсгийг танилцуулж байна. Үүнд:

Алдарт уяач Э.Ганбатын:
1. Хамар цагаан зээрд үрээ (Хязаалан) – Эцэг Оросоос ирсэн Англи-Будённый үүлдрийн “Варвар” нэртэй азарга. Энэ азарга Чита болон Агийн буриадын морин тойруулгад хэд хэд түрүүлж байсан.
Эх нь Хэнтий. Баянхутаг Уртын Дамдинжавын адууны халзан гүү. Энэ гүү нь Дамдинжавын хүргэн Очирхуягын унаган адуу юм. Дуудах үнэ 9 саяас
2. Хээр буурал үрээ (Хязаалан) – Эцэг Оросын Кавказаас ирсэн Англи-Араб үүлдрийн цагаан азарга. Энэ цагаан азарганы төлүүд улс бүсийн олон наадамд удаа дараа айраг түрүү авсан. Жишээ нь, Буяндэлгэрийн Хонгор халзан үрээ Шүдлэндээ улсад 6-д, Хязаалан Говь-Алтайн даншигт түрүү, Дүнжингаравт 2 айрагдсан. Манлай уяач С.Төмөр-Очирын буурал даага Ирээдүйн түмэн эх уралдаанд аман хүзүү.
Эх хээр гүү нь Сүхбаатар адуу.Энэ хээр гүүг Сүхбаатараас Тогмид багш авчирсан.Дуудах үнэ 6 саяас
3. Зээрд халзан үрээ (Хязаалан) – Эцэг Оросын Кавказаас ирсэн Англи-Араб үүлдрийн зээрд халзан азарга. Энэ азарганы төлүүд улс бүсийн наадамуудад олон айраг түрүү авсан. Эх нь “Даншиг” хэмээх азарганы төл. Даншиг зээрд сөнгө даага Есөн зүйлийн даншигт түрүүлж байсан. Дуудах үнэ 5 саяас
4. Хойд хоёр хөл бэлбэсэн зээрд халзан үрээ (Шүдлэн) – Эцэг Оросын Кавказаас ирсэн Англи-Кабардин үүлдэрийн “Мик” нэртэй азарга. Микийн эцэг “Каитано” (Caitano) нь Европын шилдэг хурдан англи азарга бөгөөд Орос руу 1 сая доллараар зарагдсан. Эх зээрд гүүний эцэг нь Тод манлай уяач Д.Ононгийн унаган Тойруулга гаралтай халзан азарга. Эхийн эх нь Самдангийн хүрэн азарга (улсад айрагдсан)-ны төл хүрэн гүү.
Дуудах үнэ 8 саяас
5. Халтар үрээ (Шүдлэн) – Эцэг Оросын Чита мужаас ирсэн “Хулан” нэртэй азарга.  Хулан нь Гидролог гэдэг Англи азарганы төл. Эх нь Тод манлай уяач Түвдэнгийн унаган халтар гүү. Энэ халтар гүү нь бага 4 насандаа улсад дарааллан айрагдсан Түвдэнгийн алдарт хар азарганы шууд төл юм. Дуудах үнэ 6 саяас
6. Хээр үрээ (Шүдлэн) – Эцэг нь хоёр араб адууны дундаас Монголд төрсөн “Хөөрхөнөө” нэртэй азарга. Энэ азарганы эцэг нь Билэгдэмбэрэлийн олон хурд гаргасан Араб халзан азарга юм. Азарганы эх нь Кавказаас авчирсан Араб гүү. Энэ араб гүүг Гийнаагийн хул гишгээд гарсан төл Хул азарга нь Эрдэнэтэд түрүүлж Архангайн даншигт айрагдсан. Эх хар гүү нь Сүхбаатар Онгоны Мятавын унаган адуу. Энэ хар гүүний эцэг Сүхбаатар аймгийн наадамд түрүүлж байсан Мятавын алдарт хүрэн азарга. Мятавын хүрэн азарга нь алдарт Дүйдэнгийн хар азарганы шууд үр юм. Дуудах үнэ 10 саяас
7. Зээрд гүү (8 настай) – Эцэг нь Э.Ганбатын зээрд азарга. Төв аймгийн 80 жилд аман хүзүү, Боржигоны даншигт айрагдаж байсан хурдан азарга. Энэ азарга нь Дорнодын Цагаан овоо сумын Пянз Энхээгийн унаган адуу. Эх зээрд халзан гүү нь Хар Сэмжидийн унаган адуу. Энэ гүүний эцэг нь Төв аймгийн Жаргалантын Жанчивын хонгор халзан азарга. Энэ хонгор халзан азарга нь Улаан нүдэн Дамдинсүрэнгийн зэгэл азарганы шууд үр юм. Зээрд халзан унага (эр) – Эцэг нь Улаан-Үүдийн морин тойруулгад олон түрүүлсэн “Халбек” нэртэй Англи-Будённый үүлдрийн хээр азарга. Дуудах үнэ 12 саяас (Унагатай гүү)
8. Сартай зээрд гүү (6 настай) – Эцэг Хятадын Баргаас авчирсан “Гоё хүрэн” нэртэй азарга. Энэ азарганы төл даагандаа Баянхонгорын Даншигт түрүүлж байсан. Эх зээрд гүү нь Тойруулгын 12 номертой хул азарганы төл. Хээр унага (эр) - Эцэг Оросын Кавказаас ирсэн Англи-Кабардин үүлдэрийн “Мик” нэртэй азарга. Микийн эцэг “Каитано” (Caitano) нь Европын шилдэг хурдан англи азарга бөгөөд Орос руу 1 сая доллараар зарагдсан. Дуудах үнэ 11 саяас (Унагатай гүү)

Хаана: Атлас ресторан
Хэзээ 2013.12.07-нд 12.00 цагт