Шонхор торолгүй түрүүллээ

Монгол бөхийн өргөөнд сар шинийн баярт зориулсан өсвөр бөхийн барилдаан боллоо. Улсын шонхор Б.Лхагвадорж, улсын наадмын их шөвөгт үлдэж байсан 1-р сургуулийн Б.Бямба-Эрдэнэ, улсын аваргын алтан медальт Б.Бат-Эрдэнэ, мөнгөн медальт Д.Эрдэнэтулга нараар манлайлуулсан 96 бөхийн барилдаан боллоо.
Барилдааны 3-ын даваанд Сэлэнгэ аймгийн Сайхан сумын Хөтөл тосгоны бөх, Э.Хүслэн ховдын Б.Одгэрэлийг шороодуулсан бол ОБЕГ-ын Б.Түвшинтөгс а.а С.Идэрсүрэнгийн хүү Номин-Эрдэнийг өвдөглүүлэв.
Дөрвийн даваанд Булганы Н.Намнансүрэн ОБЕГ-ын Б.Түвшинтөгсөөр, Сүхбаатарын Н.Өсөхбаяр мөн ОБЕГ-ын Ц.Нямдаваагаар даваагаа ахиуллаа.
Тавын даваанд улсын шонхор Б.Лхагвадорж Сүхбаатар аймгийн Онгон сумын харьяат, Хилчин спорт хорооны бөх Н.Өсөхбаярыг баруун золгосон барьцнаас дүүгүүрдэж угсруулж солгой талдаа давхар ачаад давав. 1-р сургуулийн Б.Бямба-Эрдэнэ “Аварга”-ын Д.Эрдэнэтулгыг орхисон бол Булганы Н.Намнансүрэн Дорноговийн Б.Бат-Эрдэнийг давуулахад сэжиж түрээд орхив.
Зургаагийн даваанд улсын шонхор гоцлож, Б.Бямба-Эрдэнэ Н.Намнансүрэнг шороодууллаа.
Үзүүр булаалдахад Б.Лхагвадорж мөн л дүүгүүрдэж давхар ачаад давснаар өнгөрсөн жил шөвгөрсөн амжилтаа ахиуллаа.
Ийнхүү сар шинийн баярт зориулсан “Бөхийн баяр” цуврал барилдааны өсвөр бөхийн барилдаанд Өвөрхангай аймгийн Нарийнтээл сумын харьяат, ОБЕГ-ын “Аврагч” спорт хороо, Макс группын бөх, сумын заан, улсын хошой шонхор Батжаргалын Лхагвадорж түрүүлж, Өмнөговь аймгийн Мандал-Овоо сумын харьяат, улсын наадмын их шөвөгт шалгарч байсан, Б Бямба-Эрдэнэ үзүүрлэлээ. Их шөвөгт Булганы Сайханы “дүүгүүр” Н.Намнансүрэн шалгарлаа.
Оноолтыг 4-ийн даваанаас үзнэ үү.
Дөрвийн даваа:
1. Б.Лхагвадорж у.ш ОБЕГ– Х.Өлзийбаяр Булган
2. Б.Бямба-Эрдэнэ 1-р сургууль  – Т.Жамсрандорж Төв
3. Б.Бат-Эрдэнэ Дорноговь – Э.Хүслэн Хөтөл
4. Д.Эрдэнэтулга Аварга – Г.Энх-Амгалан Өвөрхангай
5. Н.Намнансүрэн Булган – Б.Түвшинтөгс ОБЕГ
6. Н.Өсөхбаяр Хилчин – Ц.Нямдаваа ОБЕГ
Тавын даваа:
1. Б.Лхагвадорж у.ш ОБЕГ- Н.Өсөхбаяр Хилчин
2. Б.Бямба-Эрдэнэ 1-р сургууль  - Д.Эрдэнэтулга Аварга
3. Б.Бат-Эрдэнэ Дорноговь - Н.Намнансүрэн Булган
Зургаагийн даваа:
1. Б.Лхагвадорж у.ш ОБЕГ – гоцлов
2. Б.Бямба-Эрдэнэ 1-р сургууль - Н.Намнансүрэн Булган
Долоогийн даваа:
1. Б.Лхагвадорж у.ш ОБЕГ - Б.Бямба-Эрдэнэ 1-р сургууль