Унаач Г.Өсөхбаяр: 2013 онд аав бид хоёр одтой сайхан наадсан

-“Тод магнай”-н уншигчдад өөрийгөө танилцуулна уу. Аав ээжээсээ хэдүүлээ вэ?
-Намайг Ганбатын Өсөхбаяр гэдэг. Гуравдугаар ангид онц сурдаг, найман настай. Манай ах бас хурдан морины унаач байлаа. Гэхдээ одоо мориноос хасагдаад морь тавьдаг болсон л доо. Дүү маань дөрвөн настай. Над шиг моринд дуртай нөхөр бий. Аав маань хурдан морины уяа сойлго тааруулдаг уяач хүн. Тийм болохоор бид багаасаа л аавынхаа уясан морьдыг унаж уралддаг юм.
-Энэ хугацаанд гаргасан томоохон амжилтуудаасаа сонирхуулаач?
-Аавтайгаа олон наадамд оролцлоо Аавын бор соёолон, хязаалан, халиун морийг унадаг юм. Эндээс анх аймгийнхаа бүсийн наадамд хул соёолонгоо унаж уралдаад айргийн дөрвөөр оруулж байлаа. Түүнээс жилийн дараа Алтанширээд бор морио түрүүлгэсэн бол Сайхандулаанд дөрөвлүүлсэн. Дараа жил нь зургаан настайдаа Дэлгэрэхэд бор морьтойгоо очиж түрүүлгэсэн. Харин долоон настайдаа бор соёолонгоо аман хүзүүдүүлсэн бол 2013 онд халиун, бор хоёр мориороо Айрагаас хоёр түрүү, өөр наадмуудаас тав, зургаа айраг авч аавтайгаа тун ч сайхан наадсан.
-Аав, хүү хоёр хамгийн холдоо хаана очиж наадаж байв?
-Замын-Үүд л юм байна. Ямартаа ч мориноос хасагдах хүртлээ уралдана гэж бодож байгаа болохоор бид олон наадамд уралдаж цулбуур өргүүлнэ дээ.  Айраг, түрүүнд хурдлах үнэхээр сайхан шүү.  За бас цоллуулахад цаанаасаа л баяр бахдал төрөөд байдаг юм. Энэ мэт хурдан мориноос холдохын аргагүй сайхан мэдрэмж олон бий.
-Аавынхаа уяаны ажилд тусалж байна уу?
-Тэгэлгүй яахав. Өөрийнхөө хэмжээнд тусална. Морио унаж ирээд эргүүлээд, эмээлийг нь тавьж өгөхөөс эхлээд хийх ажил их бий.
-Маргааш наадам болно гэхэд ямар сэтгэгдэл төрдөг вэ?
-Урьд өдөр нь аавдаа туслаад л таардаг. Харин уралдааны өглөө эртлэн босож бурхандаа залбирдаг юм. Олон айраг, түрүүтэй болохсон гэж.
-Хүсэл бүхэн тань биелж унасан хүлэг болгон нь айраг түрүүнд хурдалж байг.

А.Мөнх