Сумын Алдарт уяач О.Ундрахбаяр: Энэ жилийн Дүнжингарав говийнхонд их урам хайрласан

Дундговь аймгийн Эрдэнэдалай сумын уугуул О.Ундрахбаяр "Мандалын хурд-2014" наадамд зээр үрээгээ соёолон насны уралдаанд айргийн гурваар давхиулсан юм. Түүний сэтгэгдлийг сонссоноо хүргэж байна. Тэрээр 2012 онд сумын Алдарт уяач цол хүртсэн аж.

-"Мандалын хурд-2014" уралдаанд морь айрагдуулсанд баяр хүргэе?
-За баярлалаа. Зээрд үрээ минь сайхан уралдаж айрагдсанд их баяртай байна.
-Зээрд үрээний удам угшил хаанах адуу вэ?
-Сүхбаатар аймгийн Баяндэлгэр сумын хамба Амараагийн унаган адуу. Дээд талаараа Даргын ногоон угшилтай. Манай сумын хэдэн уяач  2011 онд зүүн талаас хэдэн даага очиж авсан юм. Би хэдийг авчирсан, бүгд хурдалсан.
-Зээрд үрээ урьд нь яаж уралдаж байсан бэ?
-Бүрэн суманд даага, шүдлэндээ түрүүлсэн. Даагандаа сумандаа айрагдсан. Мөн Сайхан-Овоонд айргийн гуравт, бага наадамд хэд хэд айрагдсан.
-Энэ наадмын зохион байгуулалтын талаар? 
-Наадам сайхан боллоо. Тэнгэр хайрхан их сайхан байлаа. Зээрд үрээ минь Тэргүүн хонгортой ойрхон уралдаад байна. Улсад данстай энэ хурдан хүлэгтэй залгаж уралдаж байгаа болохоор гадагшаа гараад уралдаж болмоор сэтгэгдэл төрж байна. Энэ жилийн Дүнжингарав говийн уяачдад их урам өглөө. Нутагтаа ойрхон уралдаад  байгаа юм чинь  хойно очоод уралдаж болно гэсэн сэтгэлийн их дэм уяачдад төрөөд байх шиг байна.
-Хэдэн онд сумын Алдарт уяач болсон бэ? 
-2012 онд  сумын Алдартын болзол хангаж авсан.
-Өөр таны нэрийг гаргаж байгаа ямар хурдан хүлгүүд байна?
-Хонгор даага өнгөрсөн жил найм уралдаж долоо айрагдсан. Аймагт аман хүзүү, Сайхан-Овоо сумын 90 жилийн ойд аман хүзүүдсэн. Унаган нутаг Эрдэнэ-далай сумын 90 жилийн ойд өнгөнд уралдсаар байгаад зургаад хурдалж анх удаа айргаас мултарсан даа. Мөн ургийн наадам, Хонгорын овооны тахилгад түрүүлсэн. Түүнчлэн Адаацагт хаврын уралдаанд аман хүзүүдэж, Данай галын наадамд аман хүзүүдсэн.
-Морин жил гарсаар хэрхэн наадаж байна даа?
-Зээрд үрээгээ хоёр мянгатын наадамд айрагдуулаад "Мандалын хурд"-д мөн айрагдлаа. Манай найз Энхбаатар бид хоёр цуг уядаг юм. Түүний морьд сүүлийн үед их сайн давхиж байгаа. Өнөөдрийн уралдаанд зээрд үрээ нь түрүүлж, зээрд морь нь долоод хурдаллаа.

Ц.Амарбаяр