Дурсах зүйл арвинтай нээлтийн харваа

Хаврын адаг сарын шинийн 11, 12 буюу тавдугаар сарын 11, 12-ны билэгт сайн өдөр энэ оны нээлтийн харваа Улаанбаатар хотын сурын талбайд амжилттай болж өнгөрлөө. Жил бүрийн нээлтийн харваа МУ-ын мэргэн, спортын мастер Д.Балдандоржийн нэрэмжит болдог уламжлалтай боловч Дорнод аймгийн Баян-Уул сумын 90 жилийн ойтой давхацсан нь энэ харвааны онцлох үйл явдал боллоо. Түүнчлэн энэ оны нээлтийн харвааг Хүндэт мэргэн, спортын мастер Д.Рэнчинханд таван сая төгрөгөөр ивээн тэтгэжээ. Харвааны нээлтийн арга хэмжээн дээр Монголын Үндэсний сурын холбооноос спортын мастер Б.Өлзийдэлгэр /Дорнод/, Д.Санжаасүрэн /Увс/, В.Сумъяасүх /Сүхбаатар/нарт Хүндэт мэргэн цол хүртээж, цол тэмдэг гардуулан баяр хүргэв. Мөн Дорнод аймгийн Баян-Уул сумын уугуул, МУ-ын гавьяат тамирчин А.Цэвээн, түүний хүү Гарамгай мэргэн Ц.Хүдэрчулуун, Хүндэт мэргэн, спортын мастер Д.Рэнчинханд, Б.Өлзийдэлгэр нарт Баян-Уул сумын төр захиргаанаас хүндэтгэл үзүүлж бэлэг дурсгалын зүйлс гардуулсан юм. Нээлтийн харваанд Дорнод, Өмнөговь, Өвөрхангай, Говьсүмбэр, Төв, Орхон, Дархан-Уул, Сэлэнгэ зэрэг аймаг болон Улаанбаатар хотын бүх дүүргээс хуран цугласан 300-гаад харваач цэц мэргээ уралдууллаа. Эрэгтэй харваачдаас 40 сумнаас 38 оносон Хошой мэргэн Ц.Баасанхүү, мэргэн Б.Ёндон нар товх харваж, Ц.Баасанхүү мэргэн түрүүлж, Б.Ёндон мэргэн удаалав. 3-5 дугаар байрт 34 оноотой Хошой мэргэн Л.Отгонбаяр /Орхон/, 33 оноотой спортын мастер Дэмбэрэлсайхан /Орхон/, Б.Чулуунбаяр /Өмнөговь/ нар орсон бол эмэгтэйчүүдээс спортын мастер С.Өлзийжаргал /Төв/ 40 сумнаас 37 онож магнайлан, хоёрдугаар байрт 36 оноотой Гоц мэргэн Х.Оюунчимэг /түрүүлсэн С.Өлзийжаргалын ээж/, 3-5 дугаар байрт 34 оноотой мэргэн Г.Батзаяа /Төв/, 32 оноотой спортын мастер Ч.Гандаваа /Дорнод/, 30 оноотой спортын мастер До.Цэцэгмаа /Өвөрхангай/ нар шалгарч харваачдаа баярлуулсан юм. Нээлтийн харвааны үеэр дөрвөн харваач спортын мастер, дэд мастерын болзол хангалаа. Энэ жилийн нээлтийн  харваагаар олон харваач Хүндэт мэргэн цол хүртсэн, ээж охин хоёр үзүүр түрүүнд хүрсэн гээд ярьж дурсах зүйл арвинтай сайхан болж өнгөрсөнд харваачид сэтгэл тэнэгэр уухайлан нутаг нутгийн зүг явцгаалаа.
МУ-ын Мэргэн П.Гарамдорж