Унаач Э.Зол-Эрдэнэ: Гуядаад л, гүүглээд л морио хурдлуулдаг даа

-Миний дүүгийн унаж хурдлуулсан морь аман хүзүүдсэнд баяр хүргэе. Хэдэн наснаасаа хурдны морь унасан бэ?
-Баярлалаа. Намайг Зол-Эрдэнэ гэдэг. Таван настайгаасаа хурдны морь унасан. Одоо 14 настай. Зургадугаар ангид сурдаг.
-Хурдан морь унаснаасаа хойш хаана, хаана ямар амжилт гаргаж байсан бэ. Аавдаа олон айраг, түрүү авч өгсөн байх?
-Мөнххааны алтан овоонд нэг айрагдсан. Уулбаяны алтан овоонд бас айрагдсан. Өнөөдөр аман хүзүүдлээ. Энэ хязааланг дааган цагаас нь унаж байгаа.
-Есөн жил хурдны морь унажээ. Ер нь морь унахын сайхан нь юу байдаг юм бэ?
-Айрагдаж, түрүүлэх.
-Хязаалангийн уралдааныг дагаж байхад эхний бөөн адуун дунд явж байх шиг харагдсан. Морио яаж хурдлуулав?
-Гуядаад л, гүүглээд л, саваад л, чанга бахираад л морио хурдлуулдаг даа.
-Хамгийн холдоо хаана очиж наадаж байсан бэ?
-Мөнххаан, Уулбаян, Бор-Өндөр, Замын-Үүдэд.
-Зол-Эрдэнэ14 настай гэсэн. Аавдаа морины ажил  хийхэд нь тусалдаг биз дээ?
-Заримдаа хийнэ. Заавал уралдааны үед гэхгүйгээр хагас, бүтэн сайнаар морио унадаг.
-Танайх олон адуутай юу?
-Нэг азарга адуутай.
-“Жавхлант шарга” наадамд бас их морьтой ирсэн гэсэн. Унаж уралдсан уу?
-Хонгор морио унасан. 40 хэдээр ирсэн.
-Баярлалаа. Дүүдээ амжилт хүсье.
У.Энхмаа