Унаач М.Мөнхцэцэг: Ихэвчлэн азарга унаж байсан

Дорноговь аймагт ажиллаж байх үеэр Улаанбадрах сумын сурагч М.Мөнхцэцэгтэй уулзсан юм. Тэрээр хурдан морь унаад хоёр жил гаруй болж байгаа бөгөөд ихэвчлэн азарга унаж уралддаг сэргэлэн охин.

-Миний дүү манай уншигчдад өөрийгөө танилцуулна уу?
-Намайг Мөнхцэцэг гэдэг. Би долдугаар ангид сурдаг, 12 настай. Хурдан морь унаад хоёр жил болж байна.
-Морь унаж уралдахад хамгийн гоё нь юу байдаг юм бэ?
-Мэдээж айраг, түрүүнд хурдлах шүү дээ. Би Түмэнжаргал, Баярмөнх гэж хүмүүсийн морийг унадаг юм. Энэ хугацаанд найман айраг авчихаад байгаа. Анх сумын наадамд Энхжаргал ахын хээр азаргыг унаж түрүүлгэж байлаа. Хонгор морийг нь унаж дөрвөлсөн. Түүнээс хойш Түмэнжаргал ахын хар их морийг нь унаж Замын-Үүдэд өнгөрсөн зун түрүүлгэсэн. Ноднин Баярмөнхийн хээр даагыг есдүгээр сарын нэгэнд унаж тавлууллаа. Харин өнгөрсөн жил өөрийнхөө хар даагыг долдугаар сарын нэгэнд унаж  айргийн таваар оруулсан гээд баяр хөөр төрүүлсэн олон наадамд оролцлоо. Энэ тоолонд урам зориг нэмэгдэж, илүү их итгэл төрдөг юм.
-Аав нь морь уядаг юм уу?
-Уядаг. Манай аавыг Мөнхбат гэдэг. Тийм болохоор адуу надад их сайхан сэтгэгдэл төрүүлдэг. Тэгээд л морь унаж уралдах болсон юм. Би ихэвчлэн азарга унаж уралддаг.
-Унаач охид ер нь цөөхөн байдаг байхаа, тийм ээ?
-Тийм шүү. Улсын баяр наадмын хурдан морины уралдааныг харж байхад охид их цөөхөн харагддаг юм билээ. Манай ангид гэхэд надаас өөр байхгүй. Харин унаач хөвгүүд хэд хэд бий.
-Уралдааны тухай томчуудад хэлмээр зүйл байдаг уу?
-Том, жижиг нь ялгаагүй зохион байгуулалт сайтай байхад л болоо шүү дээ. Сүүлийн үед унаач хүүхдүүд хамгаалалтын хувцастай уралддаг болсон нь уралдааны өмнөх бидний айдсыг үргээдэг болсон гэж боддог. Мөн төхөөрөмжтэй уралддаг болсон  нь сайшаалтай юм. Энэ мэт томчуудын хийж байгаа ажилд нь талархдаг.
-Ярилцсан дүүдээ баярлалаа.

У.Энхмаа