М.Бадарч тун зоримог барилдаж уяачдын наадамд түрүүлэв

Хуучны шигшээ барилдаан, эдүгээгийн уяачдын наадам сайхан боллоо. Барилдаанд у.з Б.Соронзонболд, у.х А.Бямбажав, Г.Алтангэрэл, у.н Ц.Анхбаяр, у.н Ц.Одбаяр, а.х.а Ш.Мөнгөнбаатар, А.Алтанхуяг нараар манлайлуулсан хүчит 64 бөх зодоглон барилдав.
Бөхийн барилдааны нэгийн даваанд Увс аймгийн Тэс сумын харьяат, сумын заан Л.Дамжин Архангай аймгийн арслан Б.Мэндсайханыг, Ховд аймгийн Зэрэг сумын харьаят, сумын заан О.Есөн-Эрдэнэ Хэнтий аймгийн начин Ц.Гэрэлт-Одыг, Дорнод аймгийн начин Ш.Нямсайхан Ховд аймгийн начин Б.Отгонцоожийг тус тус шороодуулав.
Хоёрын даваанд у.х Г.Алтангэрэл а.н Ш.Нямсайханыг нааж хавираад, а.х.а А.Алтанхуяг а.х Б.Төрмагнайг хонгодож дэрлээд, а.а А.Отгонбаатар а.х М.Ганзоригийг мушгиад, а.а М.Бадарч а.а Д.Тамирыг хоёр талдаа ээлжилж мушгиад, а.х Э.Энх-Амгалан а.х.а Ш.Мөнгөнбаатарыг дагуулж бусгаад тус тус хоёр давав. Мөн Ховд аймгийн арслан Н.Батсайхан Увс аймгийн арслан Н.Ганзоригтой оноолт таарч Н.Ганзориг арслан тун уран бусгасан бөгөөд Н.Батсайхан арслан унаа холтойгоо харуулж тэвэрч эргээд давчихав. Сумын заануудын барилдаанд өрсөлдөж эхэлсэн хоёр залуу энэ даваанд мөн оноолт таарч а.а Б.Бат-Өлзийг бярдаж мушгихад уран барилдаант арслан дагаж баруун тахимдаад давлаа.
Гурвын даваанд а.х О.Бундхорол у.х А.Бямбажавыг хөнтөрч мушгихад үлдээд, Булганы шинэхэн харцага уран барилдаан үзүүлж у.х Г.Алтангэрэлийг, у.н Ц.Одбаяр дархан тахимдах мэхээрээ а.а Н.Батсайханыг, Өвөрхангай аймгийн заан М.Даваасүрэн а.х.а А.Алтанхуягийг тумбарайдаж дараад тус тус давав. Мөн а.а М.Бадарч а.а Н.Золбоогийн зүүн хөлийг шүүрч их дээр цацаад давснаар тун их бяртай байгаагаа харууллаа. А.а А.Отгонбаатар а.а Ш.Пүрэвгарьдтай нугалаанд таарч тахимдаад дайрахад нь дагуулж зүүн талдаа мушгиж тонгороод давснаар үзэгч олноо шуугиулав.
Дөрвийн оноолтод а.х Э.Энх-Амгалан у.з Б.Соронзонболдыг барьцгүй хавсарсан ч мэх дутуудаж өөрөө шороодсон бол а.а М.Бадарч а.а Ц.Чимэддоржийг хөмөрч зүтгээд давав. Мөн а.з М.Даваасүрэн а.а А.Отгонбаатараар, у.н Ц.Одбаяр а.х О.Бундхоролоор тус тус давж их шөвөгт шалгарлаа.
Их шөвөгт заан у.з Б.Соронзонболд а.з М.Даваасүрэнг амлаж давсан бол тунасан хоёрын барилдаанд залуу арслан давснаар үзүүр булаалдахаар шалгарав.
Үзүүр, түрүүнд Бадарч арслан тун зоримог барилдаж зүүн талдаа халз хутган давснаар шигшээ барилдаан буюу уяачдын наадамд түрүүллээ. Улсын наадмын начны даваанд барилдаад үзчихсэн арслан тун ч их бяртай, шийдэмгий, эрэмгий байлаа.
Энэ барилдааны үеэр улсын наадамд түрүүлсэн, улсын арслан Н.Батсуурь, үзүүрлэсэн у.г Ш.Жаргалсайхан, их шөвөгт шалгарсан у.з Ч.Санжаадамба, тав давж начин цолоо баталсан у.ө.и.н Р.Пүрэвдагва нарт давааны мөнгөн шагнал, цол чимгийн үнэмлэхийг гардуулсан юм. Мөн Увс аймгийн нутгийн зөвлөлөөс у.а Н.Батсуурь "Хүннү" хороололд дөрвөн өрөө байр бэлэглэсэн бол у.г Ш.Жаргалсайхан Завхан аймгийн нутгийн зөвлөл төв цэнгэлдэхийн ойролцоо гурван өрөө байр, Lexus-570 маркийн жийп машин бэлэглэв. Мөн зургаа давж дунд шөвөгт шалгарсан у.г Б.Гончигдамбад хурдан удмын морь, хуучны бүрэн хэрэглэлтэй эмээлийн хамт бэлэглэлээ. Шинэхэн начингуудаа ч мөн мялаасан юм.
Барилдааны оноолтыг хоёрын даваанаас үзнэ үү.
Хоёрын даваа.
1. Б.Соронзонболд у.з – Л.Дамжин с.з
2. А.Бямбажав у.х – О.Есөн-Эрдэнэ с.з
3. Г.Алтангэрэл у.х – Ш.Нямсайхан а.н
4. Ц.Анхбаяр у.н – М.Балжинням а.н
5. Ц.Одбаяр у.н – П.Түмэнжаргал ц.н
6. Ш.Мөнгөнбаатар а.х.а – Э.Энх-Амгалан а.х
7. А.Алтанхуяг а.х.а – Б.Төрмагнай а.х
8. А.Отгонбаатар а.а – М.Ганзориг а.х
9. Т.Занданбат а.а – О.Бундхорол а.х 10. Б.Нэргүй а.а – М.Даваасүрэн а.з
11. Д.Болдбаатар а.а – Д.Гантогоо а.з
12. М.Бадарч а.а – Д.Тамир а.а
13. Б.Бат-Өлзий а.а – Ш.Пүрэвгарьд а.а
14. Н.Ганзориг а.а – Н.Батсайхан а.а
15. Б.Батдорж а.а – Ц.Чимэддорж а.а
16. Ш.Дарханбат а.а – Н.Золбоо а.а
Гурвын даваа
1. Б.Соронзонболд у.з – Ц.Анхбаяр у.н
2. А.Бямбажав у.х – О.Бундхорол а.х
3. Г.Алтангэрэл у.х – Э.Энх-Амгалан а.х
4. Ц.Одбаяр у.н – Н.Батсайхан а.а
5. А.Алтанхуяг а.х.а – М.Даваасүрэн а.з
6. А.Отгонбаатар а.а – Ш.Пүрэвгарьд а.а
7. Д.Болдбаатар а.а – Ц.Чимэддорж а.а
8. М.Бадарч а.а – Н.Золбоо а.а
Дөрвийн даваа
1. Б.Соронзонболд у.з – Э.Энх-Амгалан а.х
2. Ц.Одбаяр у.н – О.Бундхорол а.х
3. А.Отгонбаатар а.а – М.Даваасүрэн а.з
4. М.Бадарч а.а – Ц.Чимэддорж а.а
Тавын даваа
1. Б.Соронзонболд у.з – М.Даваасүрэн а.з
2. Ц.Одбаяр у.н – М.Бадарч а.а
Зургаагийн даваа
1. Б.Соронзонболд у.з – М.Бадарч а.а
Т.Түмэндэмбэрэл