Уралдаанч Г.Цэрэнтогтох: Оодон халтараа айрагдуулж, бас соёолон зургаалуулсан

-Цэрэнтогтох уяач ах нартайгаа замд явна гэсэн, ямар наадамд оролцох нь вэ?
-Завхан аймгийн Яруу сумын 90 жилийн ойн наадам руу явж байна. Энд зургаан нас унана.
-АХ-ын 93 жилийн ойн баяр наадамд азарга унаж айрагдуулсан. Энэ амжилтаа бататгана гэдэгт итгэлтэй байна?
-Баярлалаа. Улсын наадамд анх удаа халтар азаргыг унаж тавлууллаа. Бас соёолон зургаалуулсан.
-Оодон халтар азаргыг анх унаж уралдсан гэсэн. Яагаад чамаар унуулах болсон юм бэ?
-Унах хүүхдийнх нь бичиг баримт нь байхгүй, тэгээд манай галын уяач намайг гуйж унуулсан.
-Ер нь төрийн их баяр наадмаар хэдэн насны морь унасан бэ?
-Азарга, их нас, соёолон, шүдлэн, хязаалан насны таван морь унасан. Их нас 40 гаргаад, хязаалан 20, шүдлэн 18-аар давхисан.
-Хурдан морь унаад хэдэн жил болж байгаа вэ?
-Таван наснаасаа унасан. Одоо 11 настай.
-Зургаан жилийн хугацаанд гаргасан амжилт цөөнгүй байх. Ер нь ямар аймгуудад очиж үзсэн бэ?
-Анх өвөөгийнхөө морийг унадаг байсан. Бор морийг нь Үнээ уулын тахилга наадамд унаж 18-аар давхиулж байлаа. Том уралдаан гэвэл энэ жил Дүнжингаравт Энхболд гэдэг хүний хүрэн азаргыг унаж түрүүлсэн. Мөн ноднин баруун бүсийн наадамд азарга, шүдлэнгээ 100 гаргаж хурдлуулж, их нас 17, даага 18-аар давхиулсан. Тэгээд ер нь аймагтаа л уралдаж байсан даа. Би Төв аймгийн хүүхэд. Өвөрхангай, Дундговь, Завхан, Улаанбаатар хотод очиж үзсэн.
-Дүнжингаравт түрүүлгэсэн хүрэн азаргыг энэ жил улсын баяр наадамд ямар хүүхэд унасан бэ?
-Мэдэхгүй.
-Ер нь хавар болон зуны уралдаанууд ямар ялгаатай байдаг вэ?
-Хаврын уралдаан шалбаагтай байдаг. Харин улсын наадамд уралдах гоё юм билээ. Зам нь ч гайгүй.
-Сүүлийн жилүүдэд хурдан морио айргийн тавд хурдлуулсан хүүхдүүдийг сая төгрөгийн хадгаламжийн эрхээр шагнаж урамшуулдаг болсон. Цэрэнтогтох хадгаламжийн дэвтрээ нээлгэсэн үү?
-Нээлгэсэн. Мөнгөө хадгалж өсгөнө дөө.
-Баярлалаа.

У.Энхмаа