Уралдаанч Г.Зол-Эрдэнэ: Анх их насны морь айрагдуулж байсан

Хурдан хүлгийн нуруун дээр гийнгоо аялан хийморь өргөн дарцаглаж яваа бяцхан уралдаанчтай цөөн хором хөөрөлдлөө. Түүнийг Галсандоржийн Зол-Эрдэнэ гэдэг. Есөн настай. Дорнод аймгийн Халхгол сумнаа амьдардаг юм. Халхгол сумын 90 жилийн ойн баяр наадмын үеэр тэрээр бидний асуултанд ийн хариулсан юм.
-Хязаалан айргийн гуравт хурдлууллаа. Баяр хүргэе?
-Баярлалаа. Хүрэлбаатар ахынхаа хязааланг унаж айрагдууллаа.Баяртай байна. Өчигдөр даага унаж, дөрөвт давхиулсан.
-Хэдэн жил хурдан морь унаж байгаа вэ?
-Би энэ жил есөн настай. Хурдны морь унаад дөрвөн жил болж байна. Хонины морь унаж байгаад, дараа нь хурдны морь унасан. Хамгийн анх Матад суманд болсон наадамд Гантулга ахын их насны морийг унаж  аман хүзүүдүүлж байсан.
-Тэгвэл өнгөрсөн хугацаанд хичнээн айраг түрүү хүртсэн бэ?
-Нэлээд хэдэн айраг түрүү авсан. Гэхдээ хэд гэдгийг нь сайн мэдэхгүй байна.
-Танай гэрээс чамаас өөр морь унадаг хүүхэд бий юу?
-Аав маань морь уядаг байсан ч одоо больсон.Би айлын том хүү. Дороо хоёр дүүтэй.
У.Энхмаа