Аймгийн Алдарт уяач Н.Батбаяр: Хээр соёолон маань энэ жил дөрөв түрүүлсэн

А.Тэлмэн
2014 оны 10-р сарын 30 -нд

-Нутгийнхаа ойд аз хийморийн бэлгэдэл соёолон түрүүлгэсэн танд баяр хүргэе?
-Баярлалаа. Говь-Алтай аймгийн Баян-Уул сум үүсч байгуулагдсаны түүхт 90 жилийн ойн арга хэмжээ өргөн дэлгэр сайхан болж,  хурдан соёолонгийн уралдаанд миний хээр үрүү түрүүлэн наадамчин олон, нутгийн ах дүүсээ баярлууллаа. Соёолон нас гэдэг хамгийн иртэй басхүү хийморь лундааны бэлгэдэл гэдэг шүү дээ. Тэр утгаар нь илүү бэлгэшээн баярлаж байгаа.
-Хээр соёолонгийн хэд дэх уралдаан нь байв?
-Сумын ойн баяр наадмаас өмнө хоёр ч бага наадамд түрүүлчихсэн байсан. Сумын 90 жилийн ойн баяр наадмын дараа ах дүү хоёр Тод манлайн мялаалга наадамд  мөн түрүүлсэн байгаа. Өөрөөр хэлбэл, хээр соёолон маань энэ жил дөрөв уралдаж дөрөв түрүүллээ. Энэ дашрамд хурдан хүлгийн маань уяа сойлгыг тааруулдаг Баянбаатар уяачдаа баярласнаа илэрхийлж сайн сайхан бүхнийг хүсэн ерөөе.
-Хурдан хүлгийн удам угшлыг нэн тэргүүнд ярих ёстой?
-Хээр үрээ Хэнтий аймгийн Баянхутаг, Сүхбаатар аймгийн Мөнххаан сумын зааг дээр нутагладаг Намжилдорж гэдэг залуугийн адуу. Би дааганд нь авсан юм. Тэдний Өвгөн хээр гээд хурдан азарганы төл гэнэ лээ. Ирсэн жилээ /2011 онд/ аймгийн баяр наадмаар 13-аар давхиад, манай аймгийн бүх сумдын айргийн таван морь ирж уралддаг “Алтайн шигшмэл хурд”уралдаанд аман хүзүүдсэн. Дараа жил нь шүдлэндээ хаврын наадамд дөрвөөр давхиад, хязааландаа төдийлөн давхиагүй. Харин энэ жил  дөрөв түрүүлчихлээ.
-Сумынхаа 90 жилийн ойд хэдэн насны морь мордуулсан бэ?
-Даага, хязаалан хоёр маань хорь гаргаж ирсэн. Хээр үрээний маань угшлын даага энэ хавар надад ирсэн юм. Тэр маань бас хорь гаргаж давхилаа. Нутаг сэлгэгдээд тэгсэн байх. Ер нь сүүлийн жилүүдэд манай аймгийн уяачид адууныхаа үүлдэр угсааг сайжруулах тал дээр ихээхэн анхаарч байгаа. Түүний үр шим ч гэсэн гарч, улс,бүсийн наадмуудад амжилттай наадаж байгаа шүү дээ. Миний хувьд ч гэсэн унаган адуугаа сайжруулах тал дээр нэлээд анхаарсан. Хойтонгоос унаган бага адуунууд уралдах байх.
-Морь уяснаас хойш ямар амжилт үзүүлээд байгаа вэ?
-Аймгийн баяр наадмаас хоёр түрүү, 7-8 айраг авсан амжилтаараа 2013 онд аймгийн Алдарт уяач цол хүртсэн.
-Шинэхэн Алдартад баяр хүргэж, дараа дараагийнх нь уралдаануудад амжилт хүсье. Ярилцсанд баярлалаа.
-Баярлалаа. Та бүхэнд ч  гэсэн ажлын амжилт хүсье.

Б.Долзодмаа

 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна