Ч.Бүргэдэйн бор

Өвөрхангай аймгийн Бүрд сумын уугуул Чүлтэмийн Бүргэдэйн бор азарга АХ-ын 93 жилийн ой төр түмнийхээ их баяр цэнгэл наадамд наймд хурдалсан. Морь сонирхогчдын эчнээ танил хурдан бор дааган цагаас эхлэн уралдаж буй. Түүний эх нь Хэнтий аймгийн Мөрөн сумын угшилтай хул гүү байдаг бол эцэг нь Ч.Бүргэдэйн төрсөн дүү Пэрэнлэйн Араб бор азарга юм. Их Монгол Улс байгуулагдсаны 800 жилийн ойгоор айргийн дөрвөөр хурдалж байсан тэрхүү Араб бор азарганы үр төлүүд эцгийн шийрийг хатаан хурдалж,одоогийн байдлаар улс бүсийн наадмаас хорь гаруй айраг түрүү хүртээд байгаагийн нэг нь Ч.Бүргэдэйн бор юм.
Бор азарга дааган цагаас эхлэн уягдаж тэр жилээ /2010 онд/ улсын наадамд найм, Орхон аймагт болсон төвийн бүсийн уралдаанд зургаад хурдалсан байдаг. Харин түүний дараа жил нь буюу 2011 онд уралдалгүй өнжөөд 2012 онд хязааландаа улсын баяр наадам болон Да лам Цэрэнчимэдийн мэндэлсэний 140 жилийн ой төвийн бүсийн уралдаанд тус тус дөрвөөр давхижээ.Ийнхүү төрийн хэдхэн хоногийн зайтай улс, бүсийн наадамд айрагдсан бор азарга могой жил буюу 2013 онд улсын баяр наадамд есөд давхиад, давхар уяагаар Архангай аймагт болсон хангайн бүсийн уралдаанд аман хүзүүдсэн бол өнөө жил улсад найм, Баянхонгор аймагт болсон говийн бүсийн уралдаанд айргийн гуравт тус тус хурдлаад буй  юм. Уралдсан цагаас эхлэн улс, бүсийн наадмаас дөрвөн айраг, аймаг, сумдын наадмаас хорь гаруй айраг хүртээд буй бор азарганы ууган төл өнгөрсөн зун мэндэлсэн бөгөөд ирэх жилээс уяна хэмээн эзэн нь хуучилна билээ.
Б.Долзодмаа