Ногт зангидах

Даваадорж
2014 оны 12-р сарын 01 -нд
Ногт нь шил, хацар, хамар, сагалдарга, эрүүний гогцоо, цулбуураас бүрдэнэ. Ногт зангидахдаа түүний хамрын баруун талын зангилгааны орчмоос цулбуурыг гарган, зүүн талын хамар доор гаргах гогцоонд гогцоолдон чангаахаар тохируулдаг. Ногтны шилэвч хоёр төө, хамравч төө, сагалдарга хоёр төө тус тус байвал эдэлгээний моринд тохирох бөгөөд ногт нь хазаараас үл мэдэг бариу байх. Учир нь ногтны хамравчийг тухайн адууны толгод хэмжиж авна. Ногтны хамравчийг цулбуураар тохируулна. Мөн шилэвчийг богиносгоход зохицуулан гүйлгээ гогцоотой ч хийдэг.
Унаганы ногт. Тэмээний ноос зэрэг зөөлөн эдээр томно. Унаганы ногтыг зангидахад эрүүний /чагтны/ гогцоог сөөм орчим урт гаргаж, түүнээс гурван хуруу зайд хамравчийг хийхдээ эрхий дээр дөрвөн хуруу нэмж хэмжиж хийнэ. Ногтны сагалдаргыг буруу талд нь хамравчаас хойш дөрвөн хуруу зайд шилэвчээс гаргана.
Унаганы зэл. Зэлийг ихэвчлэн сураар мушгиж хийнэ. Зэл хэт урт болон газарт гадас нь сулхан байваас хуйварч унага зэлэнд орооцолдоно. Зэлний хамгийн урт нь 12, богино нь 6-8 алд байх нь тохирдог бөгөөд зэлний гадас долоон төөгөөс метр хүртэл  урт бүдүүн мод, төмөр байна. Унаганы чагтыг сунгуу дэлгэж буюу метр илүү зайтайгаар зэлэнд тохируулж уядаг.
МУ-ын Манлай уяач, морин спортын ууган мастер Т.Даваадорж

1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.