Гэрийн нөхцөлд адууны шархыг хэрхэн эмчлэх вэ

Манай оронд зөвхөн адуу гэхгүй, таван хошуу мал нохой гээд ихэнх амьтдад элбэг тохиолдох гэмтэл бол мэдээж элдэв шарх юм. Ямар ч амьтанд шарх эмчлэх арга барил адил байдаг.
Шарх үүсэх шалтгаан / адуунд /
• Азарга ноцолдох болон бусад үрээ морьдыг хазах
• Хашаа хороо, жүчээний хадаас, төмөр
• Чоно нохойд хазуулах
• Хүний нөлөө
• Засах хөнгөлөхөд үүссэн шарх гэх мэт олон шалтгаантай
Шарх нь бидний нүдээр харахад хэлбэр хэмжээ, хамрах талбай гүн өнгөц янз бүр байдаг. Хэр их хэмжээ хамарсан өнгөц байгаагаас хамааран цэвэрлэх эмчлэх цаг хугацаа, шаардагдах эм бэлдмэл янз бүр байдаг.
Анхааруулахад манай малчид, уяачид шархыг цаг алдан цэвэрлэж, дутуу цэвэрлэсэнээр эдгэрэлт удааширч тэр нь цаашид адуунд муугаар нөлөөлдөг.Ийм учраас цаг алдалгүй арга хэмжээ авах нь зөв алхам болдог.
Хэрвээ танай адуу эмчтэй ойр байгаад томоохон хэмжээний шарх авсан тохиолдолд 12-24 цагийн  дотор маш сайн цэвэрлэн оёдол тавих боломжтой. Хэрвээ эмчийн тусламж  авах боломжгүй хол дээр нь томоохон хэмжээний шарх авсан бол хамгийн түрүүнд цаг алдалгүй цусыг нь тогтоож чанга боолт хийх хэрэгтэй.Мэдээж адуугаараа олон хоног яваад шарх мэдэгдэлгүй олон хоносон бол цэвэрлэх арга хэмжээ авах шаардлага гарна.
Шархыг цэвэрлэхэд танд эм бэлдмэл, ороох боох материал хэрэг болно. Үүнд:
• Хөвөн
• Бинт
• Перкс
• Иод
• Темадин
• Метилен
• Аламицин аэрозол
• Антибиотик
• Өвчин намдаах эм бэлдмэл
Хэрвээ шарх өнгөц бол перксээр цэвэрлэн бохиргүй болгосны дараа Аламицин Аэрозолыг цацаж хэрэглэнэ.
-Шарх нилээд хэмжээ хамарсан том гүн байгаа бол адуугаа тогтмол өдөр болгон цэвэрлэж эмчлэх хэрэгтэй.
1. Савантай усаар үсэнд наалдсан үрэвслийн шүүдэс идээг цэвэрлэж ойр орчмын үсийг хусаж цэвэрлэх шаардлагатай.
2. Угааж цэвэрлэсэн шархаа перкс, темадинаар цэвэрлэж ариутгана.
3. Ариутгаж цэвэрлэсэн шархандаа:
- Иод
- Метил
- Аэрозол хоёр аль нэгийг түрхэж гаднаас шархлуу бактери орохоос сэргийлж шүршиж, шавьшиж ариутгана.
4. Шархны эдгэрэлтийг түргэсгэх үүднээс эмийн бэлдмэлүүдийг хэрэглэнэ.Үүнд бүх төрлийн антибиотикууд орно. Гэхдээ тухайн адуунд тохирсон тун хэмжээ, зааврын дагуу тарьж, уулгаж хэрэглэх нь зүйтэй.