2014 оны чансаа өндөр шинэ цагийн хурдууд

ММСУХ өнөө жилээс эхлэн шинэ цагийн шилмэл хурдуудыг эрэмбэлдэг болжээ. Шинэ цагийн адууны шандас юуг гайхуулан шилдгээр эрэмбэлэгдсэн хүлгүүдийг уншигч танаа танилцуулбал:
1.АХ-ын 93 жилийн ой үндэсний их баяр наадам болон Ламын Гэгээн Лувсанданзанжанцаны мэлмий гийсний 370 жилийн ой, говийн бүсийн уралдааны түрүү Говь-Алтай аймгийн Жаргалан сумын уугуул, аймгийн Алдарт уяач Анандын Ариунсайханы Хөөрхөн зээрд 10 оноогоор жагсаалтыг тэргүүлжээ.
2. Харин хоёрдугаар байрт АХ-ын 93 жилийн ойн баяр наадамд аман хүзүүдэн, “Их мандал-3” төвийн бүсийн уралдаанд айргийн гуравт хурдалсан Төв аймгийн Сэргэлэн сумын уугуул, аймгийн Алдарт уяач  Чүлтэмийн Ган-Очирын Өсгий цагаан хүрэн долоон оноогоор бичигдсэн байна.
3.Шинэ цагийн шандаст хурдан хүлгүүдийн гуравдугаарт АХ-ын 93 жилийн ойн баяр наадамд айргийн  гуравт хурдалж, “Их мандал-3” төвийн бүсийн уралдаанд дөрвөөр давхисан Төв аймгийн Батсүмбэр сумын уугуул, аймгийн Алдарт уяач Сундуйн Лувсанбалдангийн халтар долоон оноогоор бичигджээ.
4.Завхан нутгаас төрсөн шинэ цолтнуудын нэг Дөрвөлжин сумын уугуул, МУ-ын Алдарт уяач Дайдийхүүгийн Баяраагийн Ялалт хүрэн долоон оноогоор жагсаалтын дөрөвдүгээрт бичигджээ. Ялалт хүрэн хаврын бүсийн “Дүнжингаравын хурд-2014” уралдаанд айргийн гурваар, АХ-ын 93 жилийн ой, төрийн их баяр наадамд айргийн дөрвөөр тус тус хурдалсан билээ.
5.Шинэ цагийн шилдэг хүлгүүдийн тавдугаарт АХ-ын 93 жилийн ой төрийн наадамд айргийн тав, “Их мандал-3” төвийн бүсийн уралдаанд аман хүзүүнд тус тус хурдалсан Говь-Алтай аймгийн Баян-Уул сумын уугуул Дагвадоржийн Жамъянгийн халиун долоон оноогоор бичигджээ.
6. “Дүнжингаравын хурд-2014” хаврын бүсийн уралдааны түрүүлж, Ламын Гэгээн Лувсанданзанжанцаны мэлмий гийсний 370 жилийн ой, говийн бүсийн уралдаанд айргийн дөрөвт хурдалсан Завхан аймгийн Эрдэнэхайрхан сумын уугуул, МУ-ын Алдарт уяач Намжилцэрэнгийн Даш-Өлзийгийн зээрд долоон оноогоор зургаад бичигджээ.
7.Увс аймгийн Улаангом сумын уугуул Лувсаннямын Гансүхийн Элбэг хээр азарга долоон оноогоор долоод бичигджээ. Энэ жил долоон настай Элбэг хээр “Дүнжингаравын хурд-2014” хаврын бүсийн уралдаанд айргийн таваар хурдалж, “Их мандал-3” төвийн бүсийн уралдаанд магнайдаа тоосгүй түрүүлсэн.
8. “Хотгойдын хурд-3” хангайн бүсийн уралдааны түрүүлсэн Хөвсгөл аймгийн Тариалан сумын уугуул, МУ-ын Алдарт уяач Гордоогийн Доржпүрэвийн хүрэн азарга дөрвөн оноогоор наймдугаар байранд эрэмбэлэгджээ.
9. Төр нийгмийн нэрт зүтгэлтэн Галдан бошигт хааны мэндэлсний 370 жилийн ой, баруун бүсийн уралдаанд түрүүлсэн Ховд аймгийн Цэцэг сумын уугуул, аймгийн Алдарт уяач Рагчаагийн Баатархүүгийн хээр дөрвөн оноогоор жагсаалтын есдүгээрт бичигджээ.
10. “Дорнод талын хурд-2014” зүүн бүсийн уралдааны түрүү Төв аймгийн Баянцогт сумын уугуул, аймгийн Алдарт уяач Сумъяасүрэнгийн Ганбаатарын сартай зээрд дөрвөн оноогоор аравт бичигдсэн байна.
Б.Долзодмаа