Залуу уяач П.Төмөрбаатар: Буурал азарга сумандаа хоёр дахиа түрүүллээ

Баянхонгор аймгийн Баацагаан сумын түүхт 90 жилийн ой 2014 онд тохиосон билээ. Сумынхаа ойд азарга түрүүлгэсэн залуу уяач П.Төмөрбаатартай ярилцсанаа уншигч танаа хүргэж байна.

-Сумынхаа 90 жилийн ойн баяр наадамд азарга түрүүлгэсэн танд баяр хүргэе. Баяр наадмынхаа сэтгэгдлээс хуваалцахгүй юу?
-Баярлалаа. Баацагаан сумын маань түүхт 90 жилийн ойн баяр наадам өргөн дэлгэр сайхан боллоо. Түүхт ойн баяр наадамдаа азарга, их насны морь  мордуулж, буурал азарга түрүүлгэн, их морио 13-аар давхиуллаа. Сэтгэл их өндөр байна.
-Хурдан хүлгийн удам угшлыг танилцуулах ёстой. Буурал азарга хаанахын адуу вэ?
-Буурал азарга Сухбаатар аймгийн Баяндэлгэр сумын адуу гэдэг юм. Би дамжуулж авсан болохоор нарийн сайн мэдэхгүй байна. Зүүн талаас адуу мал авчирдаг сумын шилдэг уяач Батжаргал гэдэг хүнээс 2010 онд шүдлэн үрээ авч байсан юм. 
-Танд ирэхээсээ өмнө, ирсэнээсээ хойш ямар ямар амжилт үзүүлээд байгаа вэ?
-Битүү үрээ ирээд хязаалан намар нь нэг уралдаж, айрагдаагүй ч дээхнүүр давхисан. Соёолондоо Бөмбөгөр сумын наадамд зургаагаар давхиад, сумынхаа наадамд түрүүлсэн. Одоогоор ийм л амжилт гаргаад байгаа.
-Буурал азарганы эзэн хэзээнээс хурдан хүлгийн уяа сойлго тааруулж байгаа вэ?
-2000 онд өрх тусгаарласнаасаа хойш  морь уяж байгаа. Одоогоор сумын  баяр наадмаас зургаа, долоон айраг авсан. Сая буурал азарга маань аймгийн бүсийн наадамд түрүүлж байгаа нь энэ.
-Танайхан авмал адуугаар түлхүү нааддаг бололтой. Таны хувьд?
-Олны жишгээ дагаад буурал азаргаа л авсан. Бусад нь дандаа унаган адуунууд. Манай хүргэн ах Амартүвшин гэж хүний аав Цамбаа сумандаа долоо түрүүлсэн хурдан хүрэн азаргатай. Хүргэн ахаар дамжуулаад тэр хүрэн азарганы төлүүдээс авсан.
-Залуу уяачийн дараа дараагийн уралдаануудад амжилт хүсье. Ярилцсанд баярлалаа. Унага болгон нь босоо төрж, уясан болгон нь хурдан байг.
-Тэр ерөөл бат оршиг.
"Тод магнай" сэтгүүл №62