“Хушингын хурд-2015” уралдаан амжилттай зохиогдлоо

Төв аймгийн Баяндэлгэр сумын “Шувуун саарал” МСУХ-ноос “Хушингын хурд 2015” хаврын уралдаанаа 2015 оны гуравдугаар сарын 6-ны өдөр амжилттай зохион байгууллаа. Энэ жилийн уралдаанаа Баяндэлгэр сумын нэрт уяач Дамдинжавын Дашдаваа агсны нэрэмжит болгон үр хүүхдүүдтэй нь хамтран зохион байгуулсан юм.
Монгол түмний түүхийг бичсэн морьтон ардын маань үндэсний их өв соёл болох хурдан морины уралдааныг хөгжүүлэх, түгээн дэлгэрүүлэх үйлсэд сумынхаа уяачдыг тэргүүлэн оролцож байсан нэрт уяач Д.Дашдаваа нь улсын наадмаас хоёр айраг, аймаг, сумын наадмаас олон түрүү, айраг хүртэж байсан алдартай уяач төдийгүй орон нутагтаа хурдны үрийг тарьсан буянтай буурал байв.
Түүний бэлбэсэн хээр морь нь Төв, Хэнтий аймгийн залгаа сумдад олон түрүүлж дархлагдсан хурдан хүлэг бөгөөд 1966 оны улсын наадамд зургаад хурдалж байсан юм. Мөн хонгор даагаа 1981 онд, хүргэн Г.Даваасүрэндээ авч өгсөн хонгор азаргаа 1988 онд улсын наадамд айрагдуулж байв. Энэ хонгор азаргануудын удмаас хул морь, Сарт, Дөнөн, Б.Далайн хонгор, С.Хэрлэнгийн хонгор, Жигүүр хул, Н.Загдрагчаагийн хүрэн, Б.Буяннэмэхийн хонгор халзан, Б.Билэгдэмбэрэлийн хул, С.Ганбаатарын хонгор, Өнгөгүй хул, А.Отгонбаярын хүрэн халзан зэрэг хурдан хүлгүүд төрөн гарч улс, бүсийн наадмуудад түрүүлж, айрагдаад байна.
“Хушингын хурд 2015” хаврын уралдаанд Төв аймгийн Баяндэлгэр, Архуст, Алтанбулаг, Мөнгөнморьт, Баянжаргалан, Сэргэлэн, Баян, Эрдэнэ, Хэнтий аймгийн Цэнхэрмандал зэрэг сумд, Багануур, Налайх, Багахангай дүүргээс уяачид хүрэлцэн ирж хүлэг морьдынхоо шандсыг сорьсон юм.
Хурдан азарганы уралдаанд 50 гаруй хурдан хүлэг уралдсанаас Төв аймгийн Сэргэлэн сумын удамт уяач Ц.Мэндсайханы сартай зээрд азарга түрүүлж, Эрдэнэ сумын уяач Александрын Лхагвасүрэнгийн хул азарга аман хүзүүдэж, Булган аймгийн Сэлэнгэ сумын уяач Ц.Батбаярын хул, Архуст сумын М.Жамъянсүрэнгийн саарал, Хэнтий аймгийн Цэнхэрмандал сумын уяач Ц.Азжаргалын буурал халзан азарганууд айргийн гурваас тавд хурдаллаа.
Их морины уралдаанд 84 хурдан хүлэг тоосоо өргөснөөс Төв аймгийн Эрдэнэ сумын Н.Мөнх-Эрдэнийн ухаа морь түрүүлж, Багахангай дүүргийн уяач Б.Сүхбаатарын саарал аман хүзүүнд хурдалсан бол айргийн гурваас тавд Хэнтий аймгийн Цэнхэрмандал сумын уяач Д.Болдоогийн хүрэн халзан, Төв аймгийн Баяндэлгэр сумын Б.Баярмагнайн хүрэн, Хэнтий аймгийн Цэнхэрмандал сумын уяач Н.Мөнхсүрэнгийн хүрэн тус тус хурдалжээ.
Хурдан соёолонгийн уралдаанд Төв аймгийн Архуст сумын уяач Н.Батцэрэнгийн хонгор, аман хүзүүнд Архуст сумын уяач Ч.Мөнх-Оршихын хар, айргийн гуравт Баяндэлгэр сумын уяач О.Сосорбарамын халиун, дөрөвт Архуст сумын уяач П.Энхтайваны хар, тавд Ховд аймгийн Дуут сумын уяач н.Хүрлээгийн зээрд тус тус хурдалсан байна.
“Хушингын хурд” МСУХ