Уяа нь буруудсан морины засал

Таргадсан морины хүчийг буулгах гэж ажлыг ширүүдүүлсэн учраас ядаргаанд оруулдаг тал бий. Энэ нь уяаны урьдчилсан ажлуудыг хийгээгүйгээс болж тарган морийг бороо орсны дараа үсийг хатахлаар нь нэмнэж сайн хөлсөлвөл зүдэрсэн ядаргаа аваагүйгээр хүч нь буурна. Мөн нарны илч буураагүй үед хөлсөлж хөлсийг нь хатаагүй байхад хүйтэн усаар шавшиж чичиргэж болно. Таргадсанаас болж хөдөлгөөн хурд орохгүй байгаа морийг үдшийн бүрэнхийд нэмнэж хөлсөлж, адууг нь хол байлган тэр морийг тавихад адуугаа эрт давхиж, замдаа цочрон сэргэж хурдлах нөхцөл бүрэлдэнэ. Салхитай өдөр хөлс авснаас өнгө нь буурч, хөлс нь гарахгүй болдог. Үүнийг хий цохиулсан морь гэдэг.
Хий цохиулсан морийг нарны илч буураагүй байхад нэмнэж хөлсөлж майханд оруулж хөлсийг нь даацуулан хусна. Мөн тогтуун дулаан орой хөлсөлж болно. Ер нь зарим морины хөлс төрөлхийн задгай биш байдаг. Учир иймд хөлсийг нь сайжруулах гэж янз бүрийн ажил хийж оролдсоны хэрэггүй. Гэдэс буруудвал давхихдаа амьсгал давхцах, гэдэс умдаг шахах, цээжиндээ тулалцах мэт болно. Уяандаа уйдвал хотойх, суниах, эвшээх, ус нь таарахгүй бол гэнэт цочих, газар дэвслэх,цавчлах, халуун хүйтэн нь тохироогүй бол биеэ маажилдаг, газрын байдал эс тохирвол шээс нь хар хүрэн болох, нүд нуухтах, тавихад үл хөрвөөх зэрэг байдал ажиглагддаг байна. Ингээд хөлс нь тохироогүй морийг дахин сайн хөлс авч хужиртай бүлээн усанд сайн угаах, цангааж байгаад нэмнэж хөлөргөнө. Гэдэс буруудсаны усыг нь сольж усална. Ингээд засрахгүй бол хужиргүй усанд хим өвс хольж буцалгаад өгнө. Үгүй бол халиун усны уураар гэдэс өөд нь утаж, дараа нь хүйтэн усанд оруулна. Эсвэл хар чийгийн цагаар шөнө дунд барьж, үүрээр тавина. Ингэхэд уяа нь засарч хэвийн болох магад.
Уяа нь хэтэрсэн морь богино хугацаанд амархан турах, өнгө амтгүй усан хөлс элбэгших, давхил нь буурч суулч ихтэй болох, уяан дээр үргэлж унтах, сормуус нь ээдэрч, зовхи нь зузаарч нүдний нь гал бөхөж нулимс, нуух гоожих, үс нь хэтэрхий гялалзсан өнгөтэй болох, үсэргээнд их амьсгаадах зэрэг шинж тэмдэг илэрдэг. Ингэсэн морийг бараг тавих нь дээр.