"Тод магнай" сэтгүүлийн шинэ дугаар худалдаанд гарлаа

Нялх төлийн цангинаанд малчны хот хөгжсөн налгар хаврын дулаан өдрийн мэндийг уншигч танаа хүргэе. Удтал хүлээлгэсэн шинэхэн дугаар таны өмнө дэлгээстэй байна. Энэ удаагийн дугаарын зочин хойморт зүүдэлж сэрдэг зулай цагаан Алтай нутгийн хийморилог хүү, удамт уяач, шинэхэн Манлай Туваанжавын Гантөмөр тухлан саатлаа.
Сүүлийн жилүүдэд тогтмол амжилттай, дүүрэн айрагтай наадаж буй Манлай уяач аавынхаа хийгээд өөрийнхөө талаар илэн далангүй хууч дэлгэсэн нь уншигч таны таалалд нийцэх биз ээ.
Жилийн өнгө тольдох уламжлалт “Дүнжингарав” уралдааны сурвалжлага энэ дугаарт багтсан байгаа. Эрхэм уншигч та бүхэн 15 хоногийн дараа гаргасан шийдвэрээ эргэн харж, найман адууны амжилтыг түтгэлзүүлсэн нь ямар шалтгаантай болохыг мэдэхийг хүсвэл 16-33 дугаар хуудсыг уншаарай.
Шинэ дугаарын онцлох материалуудын нэг нь ММСУХ-ны Ерөнхийлөгч М.Энхболдын ярилцлага. Тэрээр та бүхний асуухыг хүссэн олон асуултын хариултыг өгсөн байгаа. Морин спортыг сонирхогч хэн бүхний унших ярилцлага хэмээн дүгнэж байна.
“Холбоод” буланд Төв аймгийн Лүн сумын “Лүнгийн хурд” МСУХ-г үүсгэн байгуулагч болон тус сумын хийморилог уяачдын төлөөлөл оролцлоо. Шигшмэл морьдын “Их хурд” уралдаанд аман хүзүүнд хурдалсан Буурал духтын эзэн, МУ-ын Алдарт уяач О.Жамъяндорж тэргүүтэй тус сумын хийморилог уяачидтай танилцахыг хүсвэл 68-85 дугаар хуудсыг уншаарай.
Адууны үржил селекци уяачдын хамгийн их сонирхдог сэдвүүдийн нэг. Тэгвэл “Уяаны эрдэм” булан энэ удаа тэр сэдвийг онцолж, сонирхолтой нийтлэлийг хүргэж байна.
“Хийморилог зочин” булангийн оролцогч, нийслэлийн Алдарт уяач Г.Батсайхан адууны энергийн талаар тун сонирхолтой ярилцлага өрнүүлсэн.Уншигч танд тэрхүү энерги яг одоо өгүүлэгдэж байж ч болох юм. Тиймээс та энэ буланг бүү алгасаарай.
“Монголд үйлдвэрлэв” булан уяачид, морины хорхойтнууд та бүхэнд тун чухал хэрэгтэй мэдээллийг дуулгаж буй. Олон цагаар замд явдаг уншигч та бүхэнд онц хэрэгтэй тэр зүйл юу болохыг мэдэхийг хүсвэл 48-50 дугаар нүүрэнд саатаарай.
Энэ мэтчилэн дурдаад байвал шинэхэн дугаар сонин ихтэй. Тиймээс оршлоо жаргааж, уншигч танд оюунаа цэнэглэх боломжийг олгоё.
Сэтгүүлийн шинэ дугаарыг хэвлэлийн бирж, "Интерном" дэлгүүр болон  редакцийн 94082992, 95092992 дугаарын утсанд холбогдож авна уу.