Уяач У.Алтансуурь: Багадаа хурдан морь унадаг байсан маань моринд орох эхлэл байлаа

Дорноговь аймгийн Сайхандулаан сумын залуу уяач У.Алтансуурьтай хийсэн ярилцлагыг хүргэж байна.

-Алтансуурь уяач багадаа хурдан морины унаач байв уу?
-Тийм шүү. Зургаан настайдаа аавынхаа хонгор халзан морьтой анхны уралдаандаа мордож байлаа. Сүүлд хонгор халзантай нэг эцэгтэй хонгор халзан даагыг естэйдөө унаж, сумын наадмаас анхны айргаа хүртэж байв. Түүнээс хойш сумандаа гурав айрагдлаа. Энд овооны наадмын айраг, түрүү нэмэгдэнэ л дээ. Хонгор халзан даагыг аав шүдлэнд нь 1999 онд уяж байгаад хэсэг завсарлаад, би 2005, 2006 оноос залган уяж байгаа юм. Багадаа морь унадаг байсан маань ийнхүү морь уяхын эхлэл байлаа. Ингээд 2005 онд хавчиг цавьдар халзан морио дөрөвлүүлж, овооны наадамд айргийн таваар оруулж анхны айргаа амссан юм. Харин 2010 онд хуульч Сандагийн нэрэмжит уралдаанд шүдлэн айрагдуулж, зун нь сумын сургуулийн 70 жилийн ойгоор дахин айрагдуулсан. Үргэлжлүүлээд 2012 онд Хөвсгөл сумын наадамд соёолон гуравлуулж, 2013 онд хавчиг азарга тавлуулж, даага айрагдууллаа.
-Одоогоор хичнээн айраг, түрүүтэй болсон байна вэ?
-Би чинь залуу уяач шүү дээ. Одоогоор арав орчим айраг, түрүүтэй болоод байна.
-Уяаны эрдмийн А үсгийг ааваараа заалгаж байсан болов уу?
-Тэгэлгүй яахав. Аав байна. Мөн ааваас минь өөрцгүй нөмөр нөөлөгтэй нутгийн буурлууд болон Ганбаа ахаасаа зөвлөгөө авна. Тэдний хаа нэг цуглаад суухдаа ярьж байгааг нь сонсож, судлахад ямар их үнэтэй зүйл байдаг гээч.
-Адууны наймаа хийж байна уу?
-Манай үеийнхэн уулзахаараа адууны тухай л ярина шүү дээ. Тийм хурдан азарга байна. Ямар гүү тавибал болох уу гэхчилэн. Миний азарганд ч хүмүүс ганц хоёр гүү тавьж төл авдаг л юм. Яваандаа адуугаа илүү сайжруулж байгаад өндөр довд очиж уралдана даа.
-Ярилцсанд баярлалаа. Уясан болгон нь айраг түрүүнд хурдалж байх болтугай.

"Тод магнай" сэтгүүл Дорноговь аймгийн тусгай дугаар