Шилдэг эмнэг сургагч С.Женисбек: Уургалах төрөл л хүндрэлтэй байлаа

Монгол улсын шилдгийн шилдэг уран уургач, уран бугуйлч, эмнэг хангал сургагчийг шалгаруулах "Адуучин-2015" тэмцээнд Баян-Өлгий аймгийг төлөөлөн оролцож шилдэг эмнэг сургагчаар шалгарсан С.Женисбектэй уулзаж ярилцлаа. Багаасаа эмнэг хангалын нуруун дээр өссөн болохоор амархан байлаа гээд баярлах түүний ярилцлагыг хүргэе. 
- Шилдэг эмнэг сургагч болсонд баяр хүргэе. Баярынхаа сэтгэгдлээс хуваалцаач?
- Баян-Өлгий аймгаа төлөөлөн Монгол улсын шилдэг адуучин шалгаруулах “Адуучин-2015” тэмцээнд оролцож байгаадаа маш их баяртай байна. Эмнэг хангал сургах тэмцээнд алтан медаль хүртлээ.  
- Энэ тэмцээнд орох эрхийг ямар тэмцээнээс авсан бэ?
- 2014 оны  сумын аварга адуучнаар шалгарч, улмаар Баян-Өлгий аймгийнхаа шилдэг адуучин болж байсан. 2015 оны дахин аймгийн аварга болоод энэ тэмцээнд оролцох эрхтэй болсон доо. 
- Өмнө нь улсын чанартай тэмцээнд орж байсан уу?
- Тулам булаацалдах тэмцээнийг жил бүрийн Наурызын баяраар Улаанбаатар хотод Спорт аялал жуулчлалын яамнаас зохион байгуулдаг. Тэрэнд 17 настайдаа  түрүүлж байсан.  
- Уран бугуйлчийн тэмцээнд анх удаагаа оролцож байгаа юм байна. Хүндрэлтэй зүйл байна уу?
-Уургалах төрөл хүндрэлтэй байсан. Анх унаж байгаа мориныхоо занг сайн  мэдэхгүй уурга, ташуур шүүрэх төрөлд морьтойгоо уначихсан. Тэрнээс бусад төрөл бол зүгээр манайхтай адилхан байсан.
- Аль төрөл хамгийн амархан байсан бэ?
- Эмнэг сургах, багаасаа л эмнэг сургаж өссөн. Энэ төрөлдөө шилдгээр шалгараад сэтгэл өндөр баяртай байна.
- Ярилцсанд баярлалаа.

А.Энхжил