Аймгийн Алдарт уяач Х.Пүрэвдорж: Ганц үрээтэй ирээд айрагдуулчихлаа

-АХ-94 жилийн ойн баяр наадамд соёолон аман хүзүүнд хурдлуулсан эрхэм танд баяр хүргэе. Баяр наадмынхаа сэтгэгдлээс хуваалцаач?
-Баярлалаа. Төрийнхөө баяр наадамд ганц морьтой ирээд түүнийгээ айрагдуулсандаа баяртай байна.
-Дуу хуурын өлгий нутгийнхан бахархам сайхан наадлаа.
-Тэглээ. Манай аймгийн уяачид нэг түрүү, долоон айраг авсан байна лээ. Миний хувьд зээрд үрээнийхээ уяа сойлгыг нутагтаа тааруулж байгаад 7-р сарын 11-ний орой Ногоон давааны ард ирж хоноод 12-ны өглөө эрт тав гэж байхад Хүйн долоон худагт ирж, үрээгээ мордуулсан.
-Ганц үрээтэй зорьж ирж уралдахыг бодоход сунгаанд сайн байжээ дээ?
-Тиймээ. Сайн байхаар нь улсын наадамд явъя гэж шийдсэн юм.
-Төрийнхөө наадамд хэд дэх удаагаа ирж байна вэ?
-Би анх удаа ирж байна. Өмнө нь аав, дүү хоёр маань халзан үрээтэйгээ ирж, айрагдуулж байсан.
-Баяр наадмын талаарх сэтгэгдлээсээ хуваалцаач?
-Өө сайхан л болдог юм байна. Бороо хур ороогүйгээс болоод шороо тоос ихтэй байлаа. Бусдаар дажгүй дээ.
-Зорьсон хэрэг сэтгэлчлэн бүтэж, төрийн наадмын хишиг хүртлээ...
-Тэглээ. Та бүхэн харсан бол миний зээрд үрээ хойноос орж ирсэн шүү дээ. Гурав руу орж ирээд, урагшилж аман хүзүүдсэн.
-Аав минь харсан болоосой гэсэн бодол төрөө байлгүй?
- Аа, тэгэлгүй яахав. Бодогддог юм билээ.
-Алдарт айлын хэд дэх хүүхэд билээ?
-Би айлын хоёр дахь хүүхэд. Бид эцэг эхээс дөрвүүлээ. Гурван хүү, нэг охин. Гурван хүү нь гурвуулаа морь уядаг, гурвуулаа аймгийн Алдарт уяачид.
-Хуягбаатар агсан мөн аймгийн Алдарт уяач цолтой байсан санагдана?
-Тиймээ. Манайхан цөм аймгийн Алдартууд. Дүү нар маань энэ жил улсад ирээгүй ээ. Сум орон нутагтаа сайхан наадсан.
-Алдартын дараагийн наадмыг сонирхож болох уу?
-Өмнөговь руу л явах санаатай байна даа.
-Сайхан наадаарай. Амжилт хүсье.

А.Энхжил